Հայաստանի ղեկավարությունը նախկին վարչապետ Անդրանիկ
Մարգարյանի մահվան երկրորդ տարելիցի կապակցությամբ այցելեց նրա
շիրիմ
25-03-2009 17:30:00 | Հայաստան | Քաղաքական
ԵՐԵՎԱՆ, 25 ՄԱՐՏԻ, ՆՈՅՅԱՆ ՏԱՊԱՆ: Մարտի 25-ին լրացավ ՀՀ
նախկին վարչապետ, Հայաստանի Հանրապետական կուսակցության նախկին
նախագահ Անդրանիկ Մարգարյանի մահվան երկրորդ տարելիցը: Այդ
կապակցությամբ ՀՀ նախագահ Սերժ Սարգսյանը, ԱԺ նախագահ Հովիկ
Աբրահամյանը, վարչապետ Տիգրան Սարգսյանը, պաշտոնատար այլ անձինք
այցելեցին Կոմիտասի անվան քաղաքային պանթեոն, որտեղ Ա.Մարգարյանի
շիրիմն է: Երկրի բարձրագույն ղեկավարությունը, իշխող Հայաստանի
Հանրապետական կուսակցության բազմաթիվ անդամներ ծաղիկներ դրեցին
Ա.Մարգարյանի շիրմաքարին: ՀՀ նախկին վարչապետ Ա.Մարգարյանի շիրիմին
մատուցվեց հոգեհանգստի կարգ:
«Անդրանիկ Մարգարյանը երազում էր, որ իշխանությունը ծառայի
ժողովրդին, եւ իր սեփական օրինակով փորձում էր ջնջել սահմանը
պաշտոնյայի եւ քաղաքացու միջեւ: Եւ ես կարծում եմ, որ մենք բոլորս
դա անելով` նրա երազած երկիրը կկարողանանք կառուցել»,-
լրագրողներին ասաց Երեւանի քաղաքապետ Գագիկ Բեգլարյանը:
ՀՀ ԱԺ Ֆինանսա-վարկային եւ բյուջետային հանձնաժողովի նախագահ,
«ՀՀԿ» խմբակցության անդամ Գագիկ Մինասյանը նշեց, որ Ա.Մարգարյանը
անմնացորդ նվիրումով էր վերաբերում հայրենիքին եւ ժողովրդին, որը
նրա համար առաջին տեղում էր: Բացի այդ, ըստ Գ.Մինասյանի,
Ա.Մարգարյանն ուներ անկոտրում կամք` իր առջեւ դրված խնդիրները
լուծելու համար եւ, այդ ամենի հետ միասին, շատ հոգատար ընկեր էր,
երբեք չէր խառնում անձնական հարաբերությունները պետական գործերին: