ՕՊԵԿ-ը 14 մլն ԱՄՆ դոլարի վարկ կտրամադրի Հայաստանին
գյուղական տարածքների զարգացման ծրագրերի իրականացման համար
19-03-2009 16:06:00 | Հայաստան | Տնտեսություն
ԵՐԵՎԱՆ, 19 ՄԱՐՏԻ, ՆՈՅՅԱՆ ՏԱՊԱՆ: Մարտի 19-ին Հայաստանի
Ազգային Ժողովը վավերացրեց 2008թ.-ի դեկտեմբերի 23-ին Վիեննայում
ստորագրված ՀՀ եւ Միջազգային զարգացման ՕՊԵԿ հիմնադրամի միջեւ
«Շուկայավարման հնարավորություն ֆերմերներին» ծրագրի փոխառության
համաձայնագիրը: Ըստ այդմ, Հայաստանին տրամադրվելու են 14 մլն ԱՄՆ
դոլարի չափով վարկային միջոցներ` տարեկան 3,2 տոկոսադրույքով եւ
վարկի սպասարկման 1 տոկոս վարձավճարով: Վարկը տրամադրվում է 20
տարի մարման ժամկետով, որից առաջին հինգ տարին` արտոնյալ:
Ինչպես նշեց հիմնական զեկուցող, գյուղատնտեսության փոխնախարար
Սամվել Ավետիսյանը, համաձայնագրով ՀՀ-ն պարտավորվում է շուրջ 3 մլն
ԱՄՆ դոլարի չափով լրացուցիչ համաֆինանսավորում կատարել` գյուղական
տարածքների սոցիալական ենթակառուցվածքների զարգացման ծրագրերի
իրականացման համար: Վարկային գումարից 0,5 մլն ԱՄՆ դոլարը
ուղղվելու է ծրագրի իրականացման գրասենյակի պահպանման ծախսերին,
իսկ գումարի հիմնական մասը` համայնքների գազիֆիկացման ծրագրերի
իրականացմանը: Այդ նպատակով արդեն ընտրվել են առավել խոցելի եւ
անտառամերձ տարածքներում գտնվող 38 համայնքներ, որոնց համար
կազմվում են նախագծեր:
Փոխնախարարը տեղեկացրեց նաեւ մինչեւ նոր վարկային միջոցներ
ներգրավելը գյուղական տարածքների զարգացման ծրագրի շրջանակներում
իրականացված միջոցառումների մասին: Նա նշեց, որ այս տարեսկզբի
դրությամբ ընդհանուր առմամբ ծախսվել է 30 մլն ԱՄՆ դոլար: Այդ թվում
ՕՊԵԿ-ի հետ 2005թ.-ին եւ 2007թ.-ին կնքված երկու վարկային
համաձայնագրերով ստացվել են, համապատասխանաբար, 5 մլն եւ 10 մլն,
Գյուղատնտեսության զարգացման միջազգային հիմնադրամի կողմից` 15 մլն
ԱՄՆ դոլարի չափով գումարներ: 30 մլն ԱՄՆ դոլարից 8,5 մլն ԱՄՆ
դոլարը տրամադրվել է գյուղական ֆինանսավորման կառույցին, որը
վերաֆինանսավորել է ընտրված բանկերին եւ դրանց միջոցով տրամադրել
199 կարճաժամկետ եւ երկարաժամկետ վարկեր` միջինը 10-13 տոկոսով:
Բացի դրանից, արտադրական ենթակառուցվածքների զարգացման բաղադրիչով
68 համայնքներում իրականացվել են ջրամատակարարման, միջհամայնքային
ճանապարհների կառուցման, գազաֆիկացման երեք հիմնական ծրագրեր: