Տնտեսական ճգնաժամի հետեւանքները Հայաստանում կզգացվեն
աշնանը,- ասում է Ահարոն Ադիբեկյանը
06-03-2009 18:00:00 | Հայաստան | Տնտեսություն
ԵՐԵՎԱՆ, 6 ՄԱՐՏԻ, ՆՈՅՅԱՆ ՏԱՊԱՆ: Համաշխարհային
ֆինանսա-տնտեսական ճգնաժամի բացասական ազդեցությունները Հայաստանի
վրա տեսանելի կլինեն աշնանը, իսկ ամենածանր ժամանակը կլինի
2010թ.-ի գարունը: Այսպիսի կանխատեսում արեց «Սոցիոմետր» կենտրոնի
տնօրեն Ահարոն Ադիբեկյանը մարտի 6-ի ասուլիսում: Նրա խոսքերով,
հիմնական վնասը Հայաստանը կկրի արտահանման եւ շինարարական
աշխատանքների կրճատման հետեւանքով: Դրսից ստացվող տրանսֆերտների
նվազման հետեւանքով էլ, ըստ Ա.Ադիբեկյանի, ընկնելու է բնակչության
գնողունակության մակարդակը: Բացի այդ, ֆինանասական վատ վիճակի
պատճառով գյուղացին դժվարանալու է գնել սերմացու, պարարտանյութ, չի
կարողանալու վճարել տեխնիկայի համար, ինչի հետեւանքով աշնանը բերքի
ծավալների անկում կնկատվի: «Լուրջ խնդիր կունենա նաեւ
հաշմանդամների 150 հազարանոց բանակը, քանի որ կբարձրանան
դեցամիջոցների գները»,- ասաց սոցիոլոգը:
Ա.Ադիբեկյանը հայտնեց, որ վերջին ժամանակներում իր ղեկավարած
կենտրոնի անցկացրած սոցհարցման արդյունքները ցույց են տվել, որ
հասարակության եւ կառավարության պատկերացումները քաղաքացիների
կենսամակարդակի վերաբերյալ էապես տարբերվում են: Օրինակ,
կառավարությունը աղքատ է համարում այն մարդուն, ով ամսական ստանում
է 19,4 հազար դրամ, իսկ հասարակությունը` այն մարդուն, ով ստանում
է 25 հազար դրամ: Պաշտոնական տվյալներով ունեւոր է համարվում այն
մարդը, ով ունի ամսական 32 հազար դրամի եկամուտ, մինչդեռ
ժողովուրդը ունեւոր է համարում 85-ից 200 հազար դրամ ստացողին: