ՀՀ վարչապետը, ԿԲ-ի նախագահն ու էկոնոմիկայի նախարարը պետք է
հրաժարական տան,- ասում է տնտեսագետ Անդրանիկ Թեւանյանը
04-03-2009 21:00:00 | Հայաստան | Տնտեսություն
ԵՐԵՎԱՆ, 4 ՄԱՐՏԻ, ՆՈՅՅԱՆ ՏԱՊԱՆ: Հայաստանում ստեղծված
տնտեսական իրավիճակը մեծամասամբ պայմանավորված է ոչ թե միջազգային
ֆինանսա-տնտեսական ճգնաժամով, այլ Հայաստանի կառավարության
տնտեսական եւ Կենտրոնական բանկի դրամավարկային քաղաքականության
հետեւանքով: Այս մասին մարտի 4-ի ասուլիսում հայտարարեց տնտեսագետ
Անդրանիկ Թեւանյանը: Ըստ նրա, Հայաստանում տեղի ունեցող տնտեսական
գործընթացները միջազգային պրոցեսներով պայմանավորված են միայն
10-20%-ով, իսկ մնացածը` ներքին քաղաքականության հետեւանք է:
Ա.Թեւանյանի խոսքերով, մարտի 3-ը կարելի է անվանել «սեւ
երեքշաբթի»: Ըստ նրա, երեկ հանրապետությունում բացարձակ
անիշխանություն էր տիրում, քանի որ Հայաստանի տնտեսության համար
պատասխանատու 2 դեմքերը` ՀՀ նախագահն ու վարչապետը, բացարձակապես
չեն խոսել լողացող փոխարժեքի մասին: Տնտեսագետը նշեց, որ դեռեւս
անցած տարվա կեսերից էր խոսվում այն մասին, որ պետք է անցնել
կառավարելի լողացող փոխարժեքի, այսինքն յուրաքանչյուր շաբաթ
փոխարժեքը բարձրացնել 5-10 դրամով, ինչը ցնցումներ չէր առաջացնի,
իսկ 370 մլն դոլարի պատուստները չեն վատնվի: Սակայն, իշխանության
ներկայացուցիչները դա սխալ քայլ են համարել: Հիմա, ըստ
Ա.Թեւանյանի, վիճակը օրհասական է, իսկ պահուստները մաշվել են եւ
մոտեցել 1 միլիարդի սահմանագծին:
Տնտեսագետի գնահատմամբ, այն քայլերը, որ արվել են
իշխանությունների կողմից, ոչ թե տնտեսագիտության, այլ
քրեագիտության ոլորտից են: «Ես կխնդրեմ, որ դատախազությունը
քրեական գործ հարուցի եւ պարզի, թե ինչպես եղավ, որ մեկ օր առաջ
մարդիկ 31 մլն դոլարից ավելի բորսայում վաճառք են իրականացրել 307
դրամով, իսկ հաջորդ օրը ԿԲ-ն 372 դրամով դոլար է վաճառում»,-
հայտարարեց Ա.Թեւանյանը: Տնտեսագետի կարծիքով, դրա համար պետք է
պատասխան տան կոնկրետ պաշտոնյաներ, իսկ վարչապետը, ԿԲ-ի նախագահն
ու էկոնոմիկայի նախարարը պետք է հրաժարական տան: Բացի դրանից, ըստ
Ա.Թեւանյանի, դատախազությունը պետք է պարզի, թե վերջին 5 օրվա
ընթացքում ովքեր են եղել դոլարի հիմնական գնորդները, ինչպես նաեւ
կապիտալի ինչ արտահոսք է եղել Հայաստանից: