Համաշխարհային տնտեսական ճգնաժամին դիմագրավելու Հայաստանի
կառավարության ձեռնարկած քայլերը բավարար չեն,- գտնում է Թաթուլ
Մանասերյանը
26-02-2009 20:15:00 | Հայաստան | Տնտեսություն
ԵՐԵՎԱՆ, 26 ՓԵՏՐՎԱՐԻ, ՆՈՅՅԱՆ ՏԱՊԱՆ: Թեեւ ՀՀ կառավարությունը
համաշխարհային տնտեսական ճգնաժամին դիմագրավելու համար որոշ քայլեր
ձեռնարկում է, այնուամենայնիվ դրանք բավարար չեն: Նման կարծիք
փետրվարի 26-ի ասուլիսում հայտնեց տնտեսագետ Թաթուլ Մանասերյանը:
Ըստ նրա, բացի ընդհանուր ծրագրերից, անհրաժեշտ է մշակել
ազգային ծրագիր, որը հնարավորություն կտա նաեւ երկրում ձեւավորել
ազգային տնտեսության արդյունավետ կառուցվածք: Թ.Մանասերյանը գտնում
է, որ Հայաստանի համար այս փուլում շատ կարեւոր է գնահատել սեփական
ռեսուրսները: Նրա խոսքերով, Հայաստանը միայն ոչ ստանդարտ
մոտեցումներով կարող է դուրս գալ ճգնաժամից: Հակառակ դեպքում, ըստ
նրա, նույնիսկ եթե տնտեսական ճգնաժամը աշխարհում ավարտվի էլ, «մենք
դեռ շատ երկար կարող ենք մնալ այս իրավիճակում»:
Այդ առումով տնտեսագետը համոզված է, որ անհրաժեշտ է
տնտեսության զարգացման ազգային մոդելներ ստեղծել հանրապետության
յուրաքանչյուր բնակավայրի համար: Օրինակ, օգտագործելով Ջերմուկի
բնական ռեսուրները այնտեղ զարգացնել զբոսաշրջությունը, մեկ այլ
տեղում` գյուղատնտեսությունը:
Անդրադառնալով Համաշխարհային Բանկից եւ Ռուսաստանի
Դաշնությունից Հայաստանին տրվող վարկերին, Թ.Մանասերյանը նշեց, որ
անհրաժեշտ է ստեղծել հստակ մեխանիզմներ այդ գումարները ճիշտ
ծախսելու եւ դրանց վերադարձը ապահովելու համար: Նա նշեց նաեւ, որ
ՀԲ-ի վարկի տրամադրման պայմաններն ու նպատակները պարզ են, ինչը չի
կարելի ասել ՌԴ-ի կայունացման վարկի մասին: Միեւնույն ժամանակ
Թ.Մանասերյանը հուսով է, որ ավելի քան 1 մլրդ դոլարի չափով այդ
վարկային միջոցները արդյունվետ կօգտագործվեն: