ԿԱՊԱՆ, 23 ՀՈՒՆՎԱՐԻ, ՆՈՅՅԱՆ ՏԱՊԱՆ: Թեհրանի հայոց թեմի հովանավորությամբ «Հայաստան» համահայկական հիմնադրամը Սյունիքի մարզի Շվանիձոր, Ալվանք եւ Նռնաձոր համայնքներում իրագործել է արտաքին լուսավորության համակարգի կառուցման ծրագիր, որի արժեքը կազմել է շուրջ 7 մլն ՀՀ դրամ: Ինչպես «ՆՈՅՅԱՆ ՏԱՊԱՆ»-ին հայտնեցին «Հայաստան» համահայկական հիմնադրամի Գործադիր վարչությունից, շահառու համայնքներում արտաքին լուսավորության խնդիրը լուծելու համար տեղադրվել է 20-ական լուսարձակ սյուներ: Նույն բարերարների աջակցությամբ Նռնաձոր գյուղում նախորդ տարվա հոկտեմբերից մեկնարկել է ջրատարի կառուցման ծրագիր, որի առաջին փուլով նախատեսված աշխատանքներն արդեն ավարտվել են: Նոր ջրընդունիչ հորն ապահովում է գյուղ մտնող 1200 մետր երկարությամբ նորակառույց ջրատարի սնուցումը: Ծրագրի երկրորդ փուլով նախատեսվում է համայնքում ստեղծել ջրամատակարարման ներքին ցանց, 2 ջրավազան եւ պոմպակայան:

---