Ալեքսեյ Միլլեր. Հայաստանի եւ Ռուսաստանի միջեւ էներգետիկ
համագործակցությունն ունի երկարատեւ եւ փոխշահավետ բնույթ
01-12-2008 23:00:00 | Հայաստան | Տնտեսություն
ԵՐԵՎԱՆ, 1 ԴԵԿՏԵՄԲԵՐԻ, ՆՈՅՅԱՆ ՏԱՊԱՆ: Հայաստանի եւ Ռուսաստանի
միջեւ քաղաքական համագործակցության բարձր մակարդակի հիման վրա
էներգետիկայի բնագավառում երկու երկրների միջեւ
համագործակցությունն ունի երկարաժամկետ եւ փոխշահավետ բնույթ,-
Արարատ քաղաքի մերձակայքում «Քաջարան-Արարատ» մայրուղային գազատարի
գծային հատվածի շինարարության ավարտին նվիրված դեկտեմբերի 1-ի
հանդիսավոր արարողությանը նշեց ռուսաստանյան «Գազպրոմ» ԲԲԸ
վարչության նախագահ Ալեքսեյ Միլլերը:
ՀՀ էներգետիկայի եւ բնական պաշարների նախարար Արմեն
Մովսիսյանը լրագրողների հետ զրույցում նշեց, որ գազատարի գծային
աշխատանքները լրիվ ավարտվել են, մի քանի օրից կսկսվեն փորձարկման
աշխատանքները, այդպիսով գազատարը կհանձնվի շահագործման: «Գազը մենք
կարող ենք բերել այն ժամանակ, երբ դրա անհրաժեշտությունը մենք
կունենանք»,- ասաց նախարարը, ավելացնելով, որ խողովակաշարի
կառուցումը հնարավորություն կտա Հայաստան բերել տարեկան մինչեւ 2,3
-2,5 մլրդ խոր մ գազ, որը ֆորսմաժորային իրավիճակում կապահովի
ամբողջ հանրապետության էներգետիկ անվտանգությունը: Նա նշեց նաեւ,
որ երբ իրանական գազի առաքման համաձայնություն լինի Իրանի եւ այլ
երկրների միջեւ, Հայաստանը տարանցման վերաբերյալ համապատասխան
որոշում կկայացնի` ելնելով երկրի քաղաքական, տնտեսական
շահավետվությունից:
Հրազդանի ՋԷԿ-ի 5-րդ բլոկի վերաբերյալ նախարարը նշեց, որ
բլոկում աշխատանքները շարունակվում են, արդեն սկսված են զուտ
մոնտաժային կարգաբերման աշխատանքները եւ 8 ամիս կամ մոտ մեկ տարի
հետո նաեւ այն կհանձնվի շահագործման, դրանով Հայաստանը կունենա
շուրջ 430-450 ՄՎտ հզորությամբ ժամանակակից տնտեսագիտական
պահանջներին համապատասխանող կառույց, որը հնարավորություն կտա
ապահովել ներքին անվտանգությունը եւ ամբողջովին օգտագործել
արտահանման հնարավորությունները:
Հայաստանում նոր ատոմակայանի կառուցման վերաբերյալ հարցին ի
պատասխան նախարարը նշեց, որ նախապատրաստվում են կառույցի ծրագրի
ղեկավարի մրցույթի փաստաթղթերը, որոնք կներկայացվեն
կառավարություն: Եթե վերջինս համապատասխան որոշում կայացնի,
կհայտարարվի մրցույթը:
ՀՀ-ում Իրանի Իսլամական Հանրապետության արտակարգ եւ լիազոր
դեսպան Սեյեդ Ալի Սաղաիյանը լրագրողների հետ զրույցում նշեց, որ
գազատարի նախագծի պատրաստման փուլում ոչ ոք չէր հավատում, որ այն
կիրագործվի` ռելիեֆային բարդ տեղանքի պատճառով, սակայն այն
իրագործվեց: «Հուսով ենք, որ սա կնպաստի, որ է'լ ավելի ջերմանա
Իրանի եւ Հայաստանի ժողովուրդների բարեկամությունը»,- ասաց
դեսպանը, ավելացնելով, որ մինչ հաջորդ ամսվա վերջը իրանական կողմը
պատրաստ կլինի գազ արտահանել Հայաստան: «Մենք ուզում ենք, որ այս
տարվա ձմռանը Հայաստանի ժողովրդի տներում տեղադրված վառարանները
վառվեն իրանական գազից»,- ասաց իրանցի դիվանագետը: Սկզբի համար
Իրանը պատրաստ է տարեկան մոտ 1 մլրդ խորանարդ մ գազ արտահանել,
իրանական գազի 1 խորանարդ մետրի դիմաց որպես վճարում պետք է Իրան
մատակարարվի 3 կվտ /ժամ էլեկտրաէներգիա: