Հայաստանի քրեակատարողական հիմնարկներում հաճախակի են դարձել
ինքնասպանության եւ ինքնասպանության փորձերի դեպքերը
11-06-2010 20:38:00 | Հայաստան | Իրավունք
ԵՐԵՎԱՆ, 11 ՀՈՒՆԻՍԻ, ՆՈՅՅԱՆ ՏԱՊԱՆ: Վերջին շրջանում հաճախակի
են դարձել ինքնասպանության եւ ինքնասպանության փորձերի դեպքերը
Հայաստանի քրեակատարողական հիմնարկներում: Ըստ ՄԻՊ-ի աշխատակազմի
Տեղեկատվության եւ հասարակայնության հետ կապերի բաժնի հունիսի 11-ի
մամլո հաղորդագրության, ՄԻՊ-ի աշխատակազմին ներկայացրած
տեղեկատվության համաձայն, համապատասխան իրավապահ մարմինների կողմից
հարուցված են քրեական գործեր եւ իրականացվում է նախաքննություն:
ՀՀ Մարդու իրավունքների պաշտպան Արմեն Հարությունյանը հույս է
հայտնում, որ կիրականացվեն բոլոր անհրաժեշտ միջոցառումները նշված
դեպքերի օբյեկտիվ, լրիվ եւ բազմակողմանի քննության համար, ինչպես
նաեւ հանգամանորեն կքննարկվի ինքնասպանության հասցնելու վարկածը:
Պաշտպանը կոչ է անում ՀՀ Արդարադատության նախարարությանը միջոցներ
ձեռնարկել ինքնավնասման, ագրեսիվության եւ կոնֆլիկտայնության
ռիսկային խմբերում ընդգրված անձանց նկատմամբ հսկողությունը
ուժեղացնելու, ինչպես նաեւ քրեակատարողական հիմնարկներում
սոցիալ-հոգեբանական աշխատանքների մակարդակը բարձրացնելու
ուղղությամբ: