Զելենսկին հաջորդ շաբաթ կմեկնի ԱՄՆ. նախատեսված է առանձին հանդիպում Բայդենի հետ
15-09-2023 10:46:45 | Հայաստան | Ի՞նչ է գրում մամուլը
Հայկական ժամանակ. Ուկրաինայի նախագահ Վլադիմիր Զելենսկին մտադիր է սեպտեմբերի 21-ին Սպիտակ տանը հանդիպել իր ամերիկացի գործընկեր Ջո Բայդենի հետ։ Այս մասին հինգշաբթի հայտնել է Associated Press-ը՝ վկայակոչելով ամերիկյան վարչակազմի աղբյուրին։
Նշվում է, որ Զելենսկին «եկող հինգշաբթի օրը Սպիտակ տանը կհանդիպի ԱՄՆ նախագահի հետ»։ Բացի այդ, ԱՄՆ Կոնգրեսում գործակալության աղբյուրների համաձայն, Զելենսկին մտադիր է նաև այցելել ամերիկյան օրենսդիր մարմին՝ մասնակցելու Նյու Յորքում ՄԱԿ-ի Գլխավոր ասամբլեայի բարձր մակարդակի շաբաթվան։ Գործակալությունն ընդգծում է, որ Ուկրաինայի նախագահի այցը ԱՄՆ մայրաքաղաք տեղի կունենա «Կոնգրեսում Ուկրաինային 21 միլիարդ դոլար ռազմական և հումանիտար օգնություն հատկացնելու հարցի քննարկման ֆոնին»։
Բայդենի և Զելենսկու ելույթները ՄԱԿ-ի Գլխավոր ասամբլեայում նախատեսված են սեպտեմբերի 19-ի օրվա առաջին կեսին։
Սեպտեմբերի 20-ին Ուկրաինայի հարցով ՄԱԿ-ի Անվտանգության խորհրդի բարձր մակարդակով նիստ է տեղի ունենալու, սակայն մինչ այժմ ոչ ուկրաինական, ոչ ամերիկյան կողմերը չեն հաստատել նախագահների մասնակցությունն այս հանդիպմանը։