ՄԻՋԱԶԳԱՅԻՆ ՉԱՓԱՆԻՇՆԵՐՆ ՀԱՄԱՊԱՏԱՍԽԱՆՈՒԹՅՈՒՆԸ ԽԻՍՏ
ԿԱՐԵՎՈՐ ՀԱՆԳԱՄԱՆՔ Է ՀԱՅԱՍՏԱՆԻ ԴԵՂԱԳՈՐԾԱԿԱՆ ՈԼՈՐՏԻ ՀԱՄԱՐ
12-11-2008 18:00:00 | Հայաստան | Տնտեսություն
ԵՐԵՎԱՆ, 12 ՆՈՅԵՄԲԵՐԻ, ՆՈՅՅԱՆ ՏԱՊԱՆ: Երեւանում նոյեմբերի
12-ին իր աշխատանքը սկսեց Հայաստանի դեղագործության ոլորտի
զարգացմանը նվիրված համաժողովը: Երկօրյա համաժողովում կքննարկվեն
«Պատշաճ արտադրական գործունեության» (ՊԱԳ) հիմնական սկզբունքներին,
Հայաստանում դրանց ներդրմանը, ինչպես նաեւ ոլորտի զարգացմանը
վերաբերող հարցեր:
Ըստ Դեղերի եւ բժշկական տեխնալոգիաների փորձագիտական կենտրոնի
տնօրեն Էմիլ Գաբրիելյանի, այսօր շատ երկրներում ներմուծում կամ
արտահանում են միայն միջազգայնորեն ընդունված ՊԱԳ-ի չափանիշներին
համապատասխանող դեղորայք: ՊԱԳ-ը ապահովում է դեղորայքի
արտադրության միջազգային չափանիշներին համապատասխանությունը եւ
որակի վերահսկումը:
Է.Գաբրիելյանի համոզմամբ, Հայաստանում դեղերի արտադրության
ոլորտը, ուր առկա են բազմաթիվ խնդիրներ, լուրջ բարեփոխումների
կարիք ունի: «Դեղը կարեւորագույն առողջապահական գործոն է, այն
բժշկի զենքն է: Այդ առումով հատուկ պահանջներ են առաջադրվում դրա
արտադրության եւ օգտագործման համար»,- ասաց Է.Գաբրիելյանը: Ըստ
նրա, շատ ձեռնարկություններ չեն պահպանում արտադրության անհրաժեշտ
պայմանները, ինչի արդյունքում չի ապահովվում արտադրանքի որակն ու
անհրաժեշտ փաթեթավորումը: Նրա կանխատեսմամբ, եթե ներկայիս վիճակը
պահպանվի, ապա կգա մի ժամանակ, երբ Հայաստանից ոչ մի երկիր
դեղորայք չի գնի:
«Միջազգային չափանիշների հետ համապատասխանությունը խիստ
կարեւոր հանգամանք է Հայաստանի դեղագործական ոլորտի համար»,- նշեց
ՄԶԳ-ի ֆինանսավորմամբ իրականացվող «Մրցունակ մասնավոր հատված
Հայաստանում» (CAPS) ծրագրի մրցունակության ավագ փորձագետ Ալան
Սաֆֆերին: Ըստ նրա, ՊԱԳ-ի կիրառումը կնպաստի ոլորտի մրցունակության
բարձրացմանը, քանի որ դեղորայքի տեղական արտադրողները բարելավված
արտադրանքով հնարավորություն կունենան ավելի արդյունավետ մրցակցել
ներմուծողների հետ եւ ավելի մեծ թվով երկրներ արտահանել իրենց
արտադրանքը: