ՀՀ-ՈՒՄ ԳՐԱՆՑՎԱԾ ԱՌԵՎՏՐԱՅԻՆ ԻՐԱՎԱԲԱՆԱԿԱՆ ԱՆՁԱՆՑ ԹԻՎԸ ՄԵԿ
ՏԱՐՈՒՄ ԱՃԵԼ Է 5,2%-ՈՎ, ԻՍԿ ԱՆՀԱՏ ՁԵՌՆԱՐԿԱՏԵՐԵՐԻՆԸ` 34,94%-ՈՎ
04-11-2008 18:00:00 | Հայաստան | Տնտեսություն
ԵՐԵՎԱՆ, 4 ՆՈՅԵՄԲԵՐԻ, ՆՈՅՅԱՆ ՏԱՊԱՆ: ՀՀ Արդարադատության
նախարարության Իրավաբանական անձանց եւ անհատ ձեռնարկատերերի
պետական ռեգիստրի գործակալության տվյալներով, 2008թ.-ի
հունվար-սեպտեմբերին գրանցվել են 2 հազ. 798 առեւտրային
իրավաբանական անձինք եւ 13 հազ. 956 անհատ ձեռնարկատերեր, որոնց
ընդհանուր թիվը 2008թ.-ի հոկտեմբերի 1-ի դրությամբ կազմել է,
համապատասխանաբար, 58 հազ. 598 եւ 63 հազ. 263: ՀՀ Ազգային
վիճակագրական ծառայության տվյալներով, 2007թ.-ի հոկտեմբերի 1-ի
դրությամբ գրանցված են եղել 55 հազ. 708 իրավաբանական անձինք եւ 46
հազ. 881 անհատ ձեռնարկատերեր: Մեկ տարվա ընթացքում իրավաբանական
անձանց թիվն աճել է 5,2%-ով, իսկ անհատ ձեռնարկատերերինը`
34,94%-ով:
2008թ.-ի հունվար-սեպտեմբերին լուծարվել են 747 իրավաբանական
անձինք եւ 1 հազ. 141 անհատ ձեռնարկատերեր:
2008թ.-ի հունվար-սեպտեմբերին գրանցված 2 հազ. 798
իրավաբանական անձինք կատարել են մոտ 17 մլրդ 808,08 մլն դրամի (մոտ
58 մլն 230,6 հազ. ԱՄՆ դոլար) ներդրումներ: Օտարերկրյա
ներդրումներով հիմնված 283 ձեռնարկություններում կատարվել են 9
մլրդ 161,35 մլն դրամի ներդրումներ, որոնցից միայն օտարերկրյա
իրավաբանական անձանց եւ քաղաքացիների կողմից հիմնադրված 167
ձեռնարկություններում` 7 մլրդ 102,42 մլն դրամի, իսկ 116 համատեղ
ձեռնարկություններում` 2 մլրդ 58,93 մլն դրամի ներդրումներ: