ԵՐԵՎԱՆ, 23 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: «2009թ.-ի պետբյուջեի մասին» օրենքի նախագծով բյուջեի եկամտային մասը կկազմի 905 մլրդ դրամ (ավելի քան 2 մլրդ 938 մլն ԱՄՆ դոլար), ինչը 2008թ.-ի բյուջեի համեմատ 500 մլն դոլարին համարժեք դրամով ավելի է: Իսկ բյուջեի ծախսային մասը նախատեսված է 946 մլրդ դրամ: Այս մասին հոկտեմբերի 23-ի ասուլիսում հայտնեց Ազգային Ժողովի «ԲՀԿ» խմբակցության անդամ Վարդան Բոստանջյանը: Ըստ նրա, տարեցտարի կրճատվում է բյուջեի դեֆիցիտը: Այսպես, եթե 2007թ.-ին այն կազմել է 76 մլրդ դրամ, ապա 2008թ.-ին` 40 մլրդ դրամ: Վ.Բոստանջյանը նշեց, որ 2009թ.-ի բյուջեի դեֆիցիտի 30,5 մլրդ դրամը կծածկվի ներքին եւ միայն 9,5 մլրդ դրամը արտաքին աղբյուրների հաշվին: Դեֆիցիտը կազմելու է ՀՆԱ-ի ընդամենը 1%-ը: Վ.Բոստանջյանի համոզմամբ, 2009թ.-ի պետբյուջեի նախագիծը արտացոլում է կառավարության գործունեության ծրագրային նպատակները: Իսկ ինչ վերաբերում է տարածաշրջանային ֆինանսական, բիզնես եւ այլ կենտրոններ դառնալու հավակնություններին, ապա, ըստ նրա, դրանք նախատեսված է իրականացնել մինչեւ 2012թ.-ը ներառյալ:

---