ԵՐԵՎԱՆ, 21 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Ներկայումս միջազգային կոնսորցիումը ավարտել է Հայաստան-Իրան օպտիկամանրաթելային մայրուղու ավելի քան 100 կմ-անոց հատվածի կառուցումը Հայաստանում: Այս մասին հոկտեմբերի 21-ին հայտնեց Հայաստանում WiMAX ցանցը գործարկած ռուսաստանյան «Կոմսթար-ՕՏՍ» ԲԲ ընկերության տարածաշրջանային զարգացման գծով փոխնախագահ Վիկտոր Կորեշը: Նրա խոսքերով, նախպատեսվում է, որ Երեւանից սկիզբ առնող 600 կմ երկարությամբ օպտիկամանրաթելային մայրուղու կառուցումը կավարտվի 2009թ.-ին: Ըստ Վ.Կորեշի, «Կոմսթար-ՕՏՍ»-ն համաձայնություն է ձեռք բերել մայրուղու թողունակության որոշակի ծավալ օգտագործելու մասին: Նշենք, որ ներկայումս Հայաստանը արտաքին աշխարհի հետ կապվում է «ԱրմենՏել» եւ «Ֆայբերնետ» ընկերությունների Վրաստանով անցնող օպտիկամանրաթելային կապուղիներով: Նման կապուղի կառուցելու մտադրություն էր հայտնել նաեւ հայ-նորվեգական «ADC» ընկերությունը:

---