ԱՌԵՎՏՐԻ ԿԱԶՄԱԿԵՐՊՄԱՆ ՎԱՅՐԵՐՈՒՄ ՀԴՄ-ՆԵՐԻ ՆԵՐԴՐՄԱՆ
ԳՈՐԾԸՆԹԱՑՈՒՄ ԱՐԴԵՆ ՀԱՋՈՂՈՒԹՅՈՒՆՆԵՐ ԵՆ ԱՐՁԱՆԱԳՐՎՈՒՄ
17-10-2008 18:06:00 | Հայաստան | Տնտեսություն
ԵՐԵՎԱՆ, 17 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Հայաստանում գրանցված
առավել խոշոր շուրջ 80 առեւտրի կազմակերպման վայրերում, ուր
գործում են 9144 վաճառատեղեր, հոկտեմբերի 17-ի դրությամբ տեղադրված
են 2900 ցանցային հսկիչ-դրամարկղային մեքենաներ (ՀԴՄ): Ինչպես
նույն օրվա ասուլիսում նշեց ՀՀ Պետական եկամուտների կոմիտեի
նախագահի տեղակալ Արմեն Ալավերդյանը, ՀԴՄ ներկրող 5
ընկերությունները պատվիրել եւ առաջիկայում տոնավաճառներին
կտրամադրեն ավելի քան 4000 ցանցային դրամարկղային մեքենա: Ըստ նրա,
ներկրողների հետ առեւտրի կազմակերպիչների կնքած պայմանագրերով
պատվիրված ՀԴՄ-ների թիվը 7302 է:
Ա.Ալավերդյանի խոսքերով, այդ թվերը վկայում են այն մասին, որ
որակական առումով լուրջ առաջընթաց է արձանագրվել մեկ ամիս առաջ
սկսված ՀԴՄ-ների ներդրման գործընթացում: Նա միաժամանակ նշեց, որ
այն նույն հաջողությամբ չի ընթանում մարզկենտրոններում,
մասնավորապես, Արմավիրում, Կոտայքում, Աբովյանում, Գյումիրում,
Վանաձորում եւ Մարտունիում:
Կոմիտեի նախագահի տեղակալը մեկ անգամ եւս հիշեցրեց, որ
առեւտրի կազմակերպման այն վայրերը, որոնք չեն բավարարի
լիցենզավորման համար անհրաժեշտ պայմանները, այդ թվում ՀԴՄ-ների
առկայության, կդադարեցնեն իրենց գործունեությունը: Նա հայտնեց, որ
արդեն առեւտրի կազմակերպման ավելի քան 20 վայրեր դադարեցրել են
իրենց գործունեությունը հենց այդ պատճառով:
Նշվեց նաեւ, որ կոմիտեի «թեժ գծով» ստացվում են բողոքներ այն
մասին, որ որոշ վայրերում վաճառողներին պարտադրում են իրենց
միջոցներով ձեռք բերել ՀԴՄ-ներ: Մինչդեռ, ըստ Ա.Ալավերդյանի, դրանք
պետք է ձեռք բերեն առեւտրի իրականացման վայրերի կազմակերպիչները:
Ա.Ալավերդյանը հայտնեց, որ առեւտրի կազմակերպման վայրերում
ՀԴՄ-ների ներդրման գործընթացը նախատեսվում է ավարտել հոկտեմբերի
վերջերին: Ըստ նրա, գործընթացը հնարավորինս սեղմ ժամկետներում
ավարտելու համար կոմիտեի մասնագետները աջակցում են առեւտրի
իրականացման վայրերի կազմակերպիչներին եւ ՀԴՄ ներկրող
ընկերություններին: Նշվեց, որ ներկայումս քննարկվում են առեւտրի
իրականացման վայրերում տեղադրված ՀԴՄ-ների ցանցի միջոցով տվյալների
ստացման տարբերակները: