ԵՐԵՎԱՆՈՒՄ ՄԵՆԱՀԱՄԵՐԳՈՎ ՀԱՆԴԵՍ ԿԳԱ ՖՐԱՆՍԱԲՆԱԿ ՀԱՆՐԱՀԱՅՏ
ԴԱՇՆԱԿԱՀԱՐ ՎԱՐԴԱՆ ՄԱՄԻԿՈՆՅԱՆԸ
10-10-2008 19:35:00 | Հայաստան | Մշակույթ
ԵՐԵՎԱՆ, 10 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Երեւանում անցկացվող
«Վերադարձ» խորագրով դասական երաժշտության երկրորդ փառատոնի
շրջանակներում հոկտեմբերի 11-ին «Արամ Խաչատրյան» համերգասրահում
կկայանա ֆրանսաբնակ հանրահայտ դաշնակահար Վարդան Մամիկոնյանի
մենահամերգը: Հոկտեմբերի 12-ին դաշնակահարը բարեգործական համերգով
հանդես կգա նաեւ Գյումրիում:
Ինչպես հոկտեմբերի 10-ի ասուլիսում հայտնեց ԽՍՀՄ ժողովրդական
արտիստ Էդուարդ Միրզոյանը, Վ.Մամիկոնյանը երաժշտական կյանքում
երեւույթ է: «Նա հայտնի ջութակահար Լեւոն Մամիկոնյանի որդին է, եւ
ուրախ եմ, որ այսօր հոր գործը շարունակում է որդին` աշխարհին
ներկայացնելով հայկական դասական արվեստի նմուշները»,- նշեց
կոմպոզիտորը:
Վ.Մամիկոնյանի խոսքերով, ինքը «Արամ Խաչատրյան»
համերգասրահում առաջին անգամն է մենահամերգով ելույթ ունենալու,
ինչը պարտավորեցնող է: Երիտասարդ դաշնակահարի խոսքերով, ի
տարբերություն այլ երկրների, Հայաստանում երիտասարդները
հետաքրքրվում են դասական երաժշտությամբ: «Դա բացառիկ երեւույթ է,
քանի որ ես որեւէ երկրում նման հետաքրքրվածություն չեմ նկատել: Ես
վստահ եմ, որ դա գալիս է մեր դաստիրակությունից, եւ հուսով եմ, որ
այդ երեւույթը շարունակական կլինի»,- ընդգծեց դաշնակահարը: Նա
միաժամանակ նշեց, որ հայկական դասական երաժշտությունը միշտ էլ
հետաքրքրություն է առաջացնում օտարազգիների մոտ, հատկապես
Կոմիտասի, Ավետ Տերտերյանի եւ Տիգրան Մանսուրյանի
ստեղծագործությունները:
Վ.Մամիկոնյանը սովորել է Մոսկվայի Պ.Չայկովսկու անվան
կոնսերվատորիայում: Նա մասնակցել է բազմաթիվ միջազգային
փառատոների, արժանացել Մոնտե Կառլոյում անցկացվող Աշխարհի
երաժշտության վարպետների մրցույթի առաջին մրցանակին,
մենահամերգներով հանդես եկել աշխարհի հայտնի բեմերում: