ՄԵԿ ՏԱՐՈՒՄ ՀԱՅԿԱԿԱՆ ԴՐԱՄՆ ԱՄՆ ԴՈԼԱՐԻ ՆԿԱՏՄԱՄԲ 10,5%-ՈՎ
ԱՐԺԵՎՈՐՎԵԼ Է
02-10-2008 19:00:00 | Հայաստան | Տնտեսություն
ԵՐԵՎԱՆ, 2 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: 2008թ.-ի սեպտեմբերին
2007թ.-ի դեկտեմբերի համեմատ Հայաստանում սպառողական գների 4,2%
հավելաճն ուղեկցվել է ԱՄՆ դոլարի նկատմամբ հայկական դրամի
հաշվարկային փոխարժեքի 0,5% նվազումով:
ՀՀ Ազգային վիճակագրական ծառայության տվյալներով, 2008թ.-ի
սեպտեմբերին օգոստոսի համեմատ Հայաստանի սպառողական եւ արժութային
շուկաներում արձանագրվել է գների եւ ԱՄՆ դոլարի նկատմամբ հայկական
դրամի հաշվարկային փոխարժեքի, համապատասխանաբար, 0,5% եւ 0,2%
հավելաճ (ԱՄՆ դոլարն արժեվորվել է): Նախորդ տարվա նույն
ժամանակահատվածում արձանագրվել է սպառողական գների եւ հաշվարկային
փոխարժեքի, համապատասխանաբար, 0,2% եւ 7,3% նվազում: 2008թ.-ի
սեպտեմբերին ԱՄՆ դոլարի նկատմամբ հայկական դրամի միջին հաշվարկային
փոխարժեքը կազմել է 302,57 դրամ, ինչը 10,5%-ով ցածր է նախորդ
տարվա սեպտեմբերի համապատասխան ցուցանիշից (338,2 դրամ):