ԱՅՍ ՏԱՐԻ «ՄԱՆԿԱԿԱՆ ԵՎՐՈՏԵՍԻԼ» ԵՐԳԻ ՄԻՋԱԶԳԱՅԻՆ ՄՐՑՈՒՅԹՈՒՄ
ՀԱՅԱՍՏԱՆԸ ԿՆԵՐԿԱՅԱՑՆԻ ԳՅՈՒՄՐԵՑԻ ՄՈՆԻԿԱ ՄԱՆՈՒՉԱՐՈՎԱՆ
15-07-2008 17:45:00 | Հայաստան | Մշակույթ
ԵՐԵՎԱՆ, 15 ՀՈՒԼԻՍԻ, ՆՈՅՅԱՆ ՏԱՊԱՆ: Կիպրոսում նոյեմբերի 22-ին
կայանալիք «Մանկական եվրոտեսիլ» երգի միջազգային մրցույթում
Հայաստանը կներկայացնի 12-ամյա Մոնիկա Մանուչարովան` Գյումրիից:
Փոքրիկ երգչուհին կկատարի «Իմ երգի հնչյունը» երգը, որը օրեր առաջ
կայացած հայաստանյան նախընտրական փուլում արժանացել է մրցույթի
ժյուրիի եւ հանդիսատեսի հավանությանը: Ի դեպ, երաժշտությունը գրել
է Մոնիկան, իսկ երգի տեքստը` Մերի Մնջոյանը:
Ինչպես հուլիսի 15-ի ասուլիսում հայտնեց Հանրային
հեռուտատեսության արտաքին կապերի բաժնի պետ Դիանա Մնացականյանը,
մինչեւ կիպրոսյան մրցույթը կնկրահանվի երգի տեսահոլովակը, մի փոքր
կփոխվեն երգի բառերն ու երաժշտությունը, գործիքավորումը կկատարի
Արա Թորոսյանը, իսկ բեմականացումը` Արտյոմ Գեւորգյանը: Կիպրոսում
Մոնիկային կձայնակցեն Մ.Մնջոյանը (Գյումրի) եւ Սերինե Խոդիկյանը
(Էջմիածին), որոնք նույնպես մասնակցել են նախընտրական փուլին:
Նշենք, որ «Մանկական Եվրոտեսիլ»-ին կմասնակցեն 16 երկրների
ներկայացուցիչներ: Այն կկրի «Ուրախություն արեւի տակ» խորագիրը,
կանցկացվի հունական դիցաբանության մոտիվներով, իսկ հաղորդավարները
կլինեն Աֆրոդիտե եւ Ադոնիս աստվածների կերպարանքով: Մրցույթի
հովանավորն այս տարի եւս ՅՈՒՆԻՍԵՖ-ն է: