Փետրվարի 15-21-ը կանցկացվեն Մայրենի լեզվի համահայկական
տոնին նվիրված միջոցառումներ
12-02-2010 19:30:00 | Հայաստան | Հասարակություն
ԵՐԵՎԱՆ, 12 ՓԵՏՐՎԱՐԻ, ՆՈՅՅԱՆ ՏԱՊԱՆ-ՀԱՅԵՐՆ ԱՅՍՕՐ: ՀՀ սփյուռքի
նախարարությունը 2010 թվականը հայտարարել է Մայրենիի տարի: Սույն
ձեռնարկի կապակցությամբ նախարարությունը ՀՀ պետական շահագրգիռ եւ
Սփյուռքի հայկական կառույցների հետ իրականացնում է միջոցառումների
«Մեր լեզուն մեր Հայրենիքն է» խորագրով ծրագիր, որն ուղղված է
Հայաստանում եւ Սփյուռքում մայրենի լեզվի անաղարտության
պահպանմանը, մեր լեզվամշակույթի միջոցով ազգային ինքնության
ամրապնդմանը, մատաղ սերնդի մեջ լեզվական արժանապատվության
ձեւավորմանը, հայոց լեզվով ստեղծված մեր գրական-մշակութային
ժառանգության ներկայացմանը, մատաղ սերնդի հայեցի դաստիարակությանը:
ՀՀ Սփյուռքի նախարարաությունից հայտնում են, որ ծրագիրը
կմեկնարկի փետրվարի 15-ին. «Մեծարումի եւ երդումի արարողություն»
խորհրդանշական անունը կրող միջոցառման մասնակիցները ժ. 14:00 ՀՀ
սփյուռքի նախարար Հրանուշ Հակոբյանի գլխավորությամբ կլինեն
Օշականում եւ ծաղիկներ կդնեն Մեսրոպ Մաշտոցի շիրիմին:
Երեւանի քաղաքապետարանի հետ համատեղ հաջորդ միջոցառումը
կանցկացվի փետրվարի 17-ին, ժ. 14:00-ին. Մատենադարանին կից
տարածքում տեղի կունենա հանդիսավոր ցերեկույթ եւ պատվո երթ:
Իսկ փետրվարի 21-ին ժ. 19:00 Ալ. Սպենդիարյանի անվան օպերայի
եւ բալետի ազգային ակադեմիական թատրոնում կկայանա ՀՀ Նախագահ Սերժ
Սարգսյանի բարձր հովանու ներքո կազմակերպված «Մայրենի լեզվի օր»
պետական տոնին նվիրված հանդիսություն:
Միջոցառումներին զուգընթաց, փետրվարի 15-ից ՀՀ դպրոցներում
կմեկնարկի նաեւ «Մեր լեզուն մեր Հայրենիքն է» խորագրով
շարադրությունների մրցույթը: