Մեծ Բրիտանիայի Հայոց թեմի նորընտիր առաջնորդը փետրվարի 10-ին
կստանձնի իր պաշտոնը
09-02-2010 17:46:00 | Հայաստան | Հասարակություն
ԷՋՄԻԱԾԻՆ, 9 ՓԵՏՐՎԱՐԻ, ՆՈՅՅԱՆ ՏԱՊԱՆ: Փետրվարի 10-ին Մայր
Աթոռ Սուրբ Էջմիածնի միաբան Տ. Վահան ծայրագույն վարդապետ
Հովհաննիսյանը կստանձի Հայաստանյայց Առաքելական Սուրբ Եկեղեցու Մեծ
Բրիտանիայի Հայոց թեմի առաջնորդի պաշտոնը:
Ըստ Մայր Աթոռ Սբ. Էջմիածնի Տեղեկատվական համակարգից «ՆՈՅՅԱՆ
ՏԱՊԱՆ»-ին տրամադրած հաղորդագրության, Տ. Վահան ծայրագույն
վարդապետ Հովհաննիսյանը Մեծ Բրիտանիայի Հայոց թեմի առաջնորդ է
ընտրվել 2009թ.-ի դեկտեմբերին գումարված Բրիտանահայ Համայնքային եւ
Եկեղեցական խորհրդի ժողովի ընթացքում: Առաջնորդի ընտրությունը
հաստատվել է Ամենայն Հայոց Կաթողիկոսի Հայրապետական օրհնությամբ:
Վերջին տարիներին նա ծառայում էր ԱՄՆ-ի Հայոց Արեւելյան թեմի Նյու
Յորքի Սրբոց Նահատակաց եկեղեցում` իբրեւ հոգեւոր հովիվ:
Տ. Վահան ծայրագույն վարդապետ Հովհաննիսյանը (ավազանի անունը`
Սարգիս) ծնվել է 1963թ.-ին Բաղդադում: 1988թ.-ին ձեռամբ Իրաքի
Հայոց թեմի առաջնորդ Տ. Ավագ արքեպիսկոպոս Ասատուրյանի ձեռնադրվել
է սարկավագ եւ մեկնել է ԱՄՆ` ուսումը շարունակելու Նյու Յւորքի Ս.
Վլադիմիր աստվածաբանական ճեմարանում: 1990թ.-ին ձեռամբ Տ. Ավագ
արքեպիսկոպոս Ասատուրյանի ձեռնադրվել է կուսակրոն քահանա:
1995թ.-ին, պաշտպանելով վարդապետական ատենախոսությունը, ստացել է
Մասնավոր վարդապետության առաջին չորս աստիճանները` ձեռամբ ԱՄՆ
Հայոց Արեւելյան թեմի առաջնորդ Տ. Խաժակ արքեպիսկոպոս Պարսամյանի:
2006թ.-ին ստացել է ծայրագույն վարդապետության աստիճան`
պաշտպանելով ատենախոսություն «Գ. Կորնթացիս թուղթը» թեմայով: Նույն
տարիներին որպես հոգեւոր հովիվ ծառայել է Նյու Յորքի Ս. Խաչ եւ
Նյու Ջերսիի Սրբոց Ղեւոնդյանց եւ Նյու Յորքի Սրբոց Նահատակաց
եկեղեցիներում: Որոշ շրջան եղել է Ս. Վարդան առաջնորդանիստ
եկեղեցու լուսարարապետը: Ֆորդհեմ համալսարանից ստացել է
Աստվածաշնչագիտության դոկտորի աստիճան: