«Մանկավարժության մեջ մանրուքներ չկան»,- պնդում է Անանիա
Շիրակացի ճեմարանի տնօրեն Աշոտ Ալիխանյանը
30-01-2010 09:00:00 | Հայաստան | Հասարակություն
ԵՐԵՎԱՆ, 30 ՀՈՒՆՎԱՐԻ, ՆՈՅՅԱՆ ՏԱՊԱՆ-ՀԱՅԵՐՆ ԱՅՍՕՐ: Երեւանի
Անանիա Շիրակացու անվան ճեմարանում տեղի ունեցավ
«Շիրակացու օրեր» փառատոնի հանդիսավոր բացումը:
Ճեմարանը, որն այս տարի նշելու է հիմնադրման 20-ամյակը,
ստեղծվել է որպես շնորհալի երեխաների կրթօջախ:
Նշվեց, որ հավատարիմ մնալով իր գաղափարախոսությանը, այն է`
դեմոկրատիա, ինտերնացիոնալիզմ, բնապահպանություն, հոգու եւ մարմնի
միասնություն, ծառայություն մարդկությանը, ճեմարանն ապրում է
բազմաբովանդակ կյանքով եւ ամեն տարի համալրում իր սաների` տարբեր
առարկաներից վաստակած մեդալների թիվը:
Ճեմարանի սաները իսկապես տպավորիչ արդյունքներ են ցույց
տալիս, քանի որ, օրինակ, 2009թ. հանրապետական օլիմպիադայի
եզրափակիչ երրորդ փուլին մասնակցած ճեմարանի 37 սաներից 10-ը շահել
են դիպլոմներ, 3 շրջանավարտ արժանացել է նախագահի հատուկ մրցանակի:
Ճեմարանականների հաջողությունները չեն սահմանափակվում
ձեռքբերումներով միայն Հայաստանում. Մոսկվայում տեղի ունեցած
«Կանաչ մոլորակ» միջազգային էկոլոգիական ստուգատեսին ճեմարանի
աշակերտը ներկայացրել է իր աշխատանքը` «Գիտափորձ տիեզերքում», եւ
արժանացել դափնեկրի կոչման, Եգիպտոսում նկարչության միջազգային
մանկապատանեկան մրցույթի ժամանակ երեք ոսկե մեդալներն էլ ճեմարանի
սաներն են շահել:
Ճեմարանի տնօրեն Աշոտ Ալիխանյանը նշեց, որ քսաներկու աշակերտ
այժմ սովորում է Թաիլանդի Ռեջենթների դպրոցում, իսկ ճեմարանը
նախկին ԽՍՀՄ տարածքից միակ ուսումնական հաստատությունն է, որ
հանդիսանում է աշխարհահռչակ "Roundsquear" միջազգային դպրոցների
համաշխարհային ասոցիացիայի անդամ, որի կազմում ընդգրկված է
ընդամենը 95 դպրոց ամբողջ աշխարհից այնպիսի երկրներից, ինչպիսիք են
Անգլիան, Ֆրանսիան, Գերմանիան, ԱՄՆ-ը, Ճապոնիան եւ այլն:
«Շիրակացու օրեր» փառատոնը անց է կացվում 1992թ.-ից: Փառատոնի
ընթացքում աշակերտները եւ աշխատակիցները ներկայացնում են իրենց
զեկույցները տարբեր թեմաներով. զեկույցները այնուհետեւ տեղադրվելու
են կայքում:
Աշակերտները մեծ ոգեւորությամբ եւ պատսխանատվությամբ են
պատրաստվում իրենց ելույթներին` կիրառելով ստացած գիտելիքները:
Բացման արարողության ընթացքում ԵՊՀ-ի ռեկտորը եւ մի շարք
դասախոսներ պարգեւատրվեցին Անանիա Շիրակացի ճեմարանի անվան
մեդալով:
Ինչպես նշեցին իրենք` մրցանակակիրները, ճեմարանի կրթությունը
ստացած ուսնողները տարբերվում են մյուս ուսանողներից: Այստեղ
աշակերտները այլ ուսումնական ծրագրերով են սովորում եւ կրթության
նախարարության կողմից անց կացված ստուգատեսից հետո նամակ է
ուղղարկվել կրթության եւ գիտության նախարարին` ճեմարանի որոշ
ծրագրեր հանրակրթական դպրոցներում կիրառելու մասին առաջարկով:
Փառատոնը շարունակվելու է մինչեւ մայիս, որի ընթացքում
զեկույցներից բացի կցուցադրվեն նաեւ աշակերտների թատերական
ներկայացումները, վերջում կհանձնվեն պարգեւները եւ տեղի կունենա
փառատոնի հնադիսավոր փակումը: