ՕԲԱՄԱՆ ԵՐՐՈՐԴ ԱՆԳԱՄ ՀԵՌՈՒՍՏԱԲԱՆԱՎԵՃՈՒՄ ՀԱՂԹԵԼ Է ՄԱԿՔԵՅՆԻՆ
16-10-2008 18:10:00 | ԱՄՆ | Միջազգային
ՎԱՇԻՆԳՏՈՆ, 16 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Հասարակական կարծիքի
հարցումները ցույց են տվել, որ ԱՄՆ-ի նախագահի թեկնածու դեմոկրատ
սենատոր Բարաք Օբաման երրորդ անգամ նախընտրական հեռուստաբանավեճում
հաղթել է իր մրցակցին` հանրապետական սենատոր Ջոն Մակքեյնին:
CNN-ի ուսումնասիրությունը ցույց է տվել, որ բանավեճին
հեռուստացույցով հետեւող ամերիկացիների 58%-ը հաղթանակը շնորհել է
Բարաք Օբամային: Սենատոր Մակքեյնին հաղթող են ճանաչել
ամերիկացիների 31%-ը: CBS-ի հարցումը ցույց է տվել, որ
դեմոկրատական կուսակցության թեկնածուին հաղթող են համարում
հեռուստաբանավեճը դիտած ընտրողների 53%-ը, իսկ Ջոն Մակքեյնին` սոսկ
22%-ը:
Կայացած հեռուստաբանավեճը եղել է երրորդը եւ վերջինը
նոյեմբերի 4-ին նախատեսված նախագահական ընտրություններից առաջ: