ԵՐԵՎԱՆ, 19 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: ՄԱԿ-ի հայաստանյան ասոցիացիայի եւ Շախմատի հանրապետական ակադեմիայի նախաձեռնությամբ սեպտեմբերի 19-ին Երեւանի պետական համալսարանի պուրակում անցկացվեց շախմատային փառատոն, որի բացմանը ներկա էր ՀՀ նախագահ Սերժ Սարգսյանը: Փառատոնի մասնակիցներին ողջույնի խոսքով դիմեցին ՄԱԿ-ի հայաստանյան գրասենյակի համակարգող Կոնսուելո Վիդալը, ՄԱԿ-ի հայաստանյան ասոցիացիայի նախագահ Արմինե Պոդոսյանը, ՀՀ սպորտի եւ երիտասարդության հարցերի նախարար Արմեն Գրիգորյանը եւ շախմատի հանրապետական ակադեմիայի նախագահ գրոսմայստեր Սմբատ Լպուտյանը: 4-րդ անգամ անցկացված ՄԱԿ-ի գավաթի խաղարկությանը մասնակցեցին Հայաստանի բոլոր քաղաքների եւ Երեւանի շախմատային մարզադպրոցների մինչեւ 12 տարեկան առաջատար պատանիները: Միաժամանակյա խաղաշարով հանդես եկան գրոսմայստերներ համաշխարհային օլիմպիադայի չեմպիոն Վլադիմիր Հակոբյանը, «Սեւանա լիճ» միջազգային մրցաշարի հաղթող Արման Փաշիկյանը եւ միջազգային բազմաթիվ մրցաշարերի հաղթող Տիգրան Լեւոնի Պետրոսյանը:

---