ՀՀ ԿԲ-Ի ԽՈՐՀՈՒՐԴԸ 0,25%-ՈՎ ԲԱՐՁՐԱՑՐԵԼ Է ՎԵՐԱՖԻՆԱՆՍԱՎՈՐՄԱՆ
ՏՈԿՈՍԱԴՐՈՒՅՔԸ` ՍԱՀՄԱՆԵԼՈՎ ԱՅՆ 6,75%
05-05-2008 20:00:00 | Հայաստան | Տնտեսություն
ԵՐԵՎԱՆ, 5 ՄԱՅԻՍԻ, ՆՈՅՅԱՆ ՏԱՊԱՆ: 2008թ.-ի մայիսի 5-ի նիստում
ՀՀ Կենտրոնական բանկի խորհուրդը 0,25%-ով բարձրացրել է
վերաֆինանսավորման տոկոսադրույքը` սահմանելով այն 6,75%:
Ինչպես «ՆՏ»-ին հայտնեցին ՀՀ ԿԲ-ի մամուլի ծառայությունից,
2008թ.-ի ապրիլին մարտի նկատմամբ արձանագրվել է 1,1% գնաճ, որի
պարագայում 12-ամսյա գնաճը կազմել է 10,7%` շուրջ 4%-ով բարձր
նախորդ տարվա վերջում արձանագրված մակարդակից:
ԿԲ-ի խորհուրդը արձանագրել է, որ համաշխարհային պարենային
շուկաներում բարձր գնաճային միջավայրը եւ դրանով պայմանավորված
պարենային ապրանքների ներքին գների վրա ճնշումները շարունակել են
պահպանվել, իսկ արտաքին միջավայրի հետագա զարգացումների
անորոշության աստիճանը մնացել է բարձր: Միաժամանակ, պարենային
ապրանքների գների բարձրացման երկրորդային ազդեցությունները առավել
ուժգնացել են` մեծացնելով գնաճային ճնշումները ոչ պարենային
ապրանքների ու ծառայությունների շուկաներում, եւ ավելացրել
գնաճային սպասումները:
ԿԲ-ի խորհուրդը համակարծիք է, որ առաջիկայում գնաճային
ճնշումները պահպանվելու են: ԿԲ-ի կողմից դրամավարկային պայմանների
աստիճանական խստացումը նպատակ ունի մեղմելու արտաքին
զարգացումներով պայմանավորված գնաճային երկրորդային
ազդեցությունները եւ սպասումները: