ՀՀ ԿԲ-Ի ԽՈՐՀՈՒՐԴԸ 0,25%-ՈՎ ԲԱՐՁՐԱՑՐԵԼ Է ՎԵՐԱՖԻՆԱՆՍԱՒՈՐՄԱՆ
ՏՈԿՈՍԱԴՐՈՒՅՔԸ` ՍԱՀՄԱՆԵԼՈՎ ԱՅՆ 6,75%
05-05-2008 20:00:00 | Հայաստան | Տնտեսութիւն
ԵՐԵՎԱՆ, 5 ՄԱՅԻՍԻ, ՆՈՅԵԱՆ ՏԱՊԱՆ: 2008թ.-ի մայիսի 5-ի նիստում
ՀՀ Կենտրոնական բանկի խորհուրդը 0,25%-ով բարձրացրել է
վերաֆինանսաւորման տոկոսադրույքը` սահմանելով այն 6,75%:
Ինչպէս «ՆՏ»-ին յայտնեցին ՀՀ ԿԲ-ի մամուլի ծառայութիւնից,
2008թ.-ի ապրիլին մարտի նկատմամբ արձանագրուել է 1,1% գնաճ, որի
պարագայում 12-ամսեայ գնաճը կազմել է 10,7%` շուրջ 4%-ով բարձր
նախորդ տարուայ վերջում արձանագրուած մակարդակից:
ԿԲ-ի խորհուրդը արձանագրել է, որ համաշխարհային պարենային
շուկաներում բարձր գնաճային միջավայրը եւ դրանով պայմանաւորուած
պարենային ապրանքների ներքին գների վրայ ճնշումները շարունակել են
պահպանուել, իսկ արտաքին միջավայրի յետագայ զարգացումների
անորոշութեան աստիճանը մնացել է բարձր: Միաժամանակ, պարենային
ապրանքների գների բարձրացման երկրորդային ազդեցութիւնները առաւել
ուժգնացել են` մեծացնելով գնաճային ճնշումները ոչ պարենային
ապրանքների ու ծառայութիւնների շուկաներում, եւ աւելացրել
գնաճային սպասումները:
ԿԲ-ի խորհուրդը համակարծիք է, որ առաջիկայում գնաճային
ճնշումները պահպանվելու են: ԿԲ-ի կողմից դրամավարկային պայմանների
աստիճանական խստացումը նպատակ ունի մեղմելու արտաքին
զարգացումներով պայմանաւորուած գնաճային երկրորդային
ազդեցութիւնները եւ սպասումները: