ՄԱՐՏԻ 31-ԻՑ ԱՊՐԻԼԻ 7-Ը ՀԱՅԱՍՏԱՆՈՒՄ ԿԱՆՑԿԱՑՎԻ
«ՄԱՆԿԱՊԱՏԱՆԵԿԱՆ ԳՐՔԻ ՇԱԲԱԹ»
25-03-2008 18:15:00 | Հայաստան | Մշակույթ
ԵՐԵՎԱՆ, 25 ՄԱՐՏԻ, ՆՈՅՅԱՆ ՏԱՊԱՆ: ՀՀ Մշակույթի նախարարության
Գրահրատարակչական գործի գործակալության եւ Հայաստանի Գրողների
միության (ՀԳՄ) նախաձեռնությամբ մարտի 31-ից ապրիլի 7-ը
Հայաստանում կանցկացվի «Մանկապատանեկան գրքի շաբաթ»: Ինչպես
«ՆՈՅՅԱՆ ՏԱՊԱՆ»-ի թղթակցին հայտնեց ՀԳՄ-ի նախագահ Լեւոն Անանյանը,
գրական մշակութային կյանքը աշխուժացնելու նպատակով արդեն 6-րդ
տարին է, ինչ շաբաթը մեկնարկում է մարզերում. այս տարի այն կսկսվի
Վայոց ձորում:
«Մանկապատանեկան գրքի շաբաթ»-ի օրերին հանրապետության
դպրոցներում, գրադարաններում եւ մշակութային կենտրոններում
կկազմակերպվեն մանկական գրքերի շնորհանդեսներ եւ քննարկումներ, հայ
մանկագիրների հանդիպումները դպրոցահասակ երեխաների հետ:
Լ.Անանյանը նշեց, որ ապրիլի 7-ին Խնկո Ապոր անվան մանկական
գրադարանում կկայանա ՀԳՄ-ի ամենամյա մրցանակի հանձնման
արարողությունը: Միության որոշմամբ այս տարի մրցանակը կշնորհվի
մանկագիր Հենրիկ Սեւանին: