ՀՈԿՏԵՄԲԵՐԻ 14-ԻՆ ԵՐԵՎԱՆՈՒՄ ԿԲԱՑՎԻ «ARMENIA EXPO - 2008»
ՄԻՋԱԶԳԱՅԻՆ ՑՈՒՑԱՀԱՆԴԵՍԸ
07-10-2008 16:28:00 | Հայաստան | Տնտեսություն
ԵՐԵՎԱՆ, 7 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: «LOGOS EXPO» կենտրոնի
նախաձեռնությամբ հոկտեմբերի 14-ից Երեւանի «Դինամո» մարզադաշտի
սրահներում կգործի «ARMENIA EXPO-2008» ունիվերսալ տարածաշրջանային
առեւտրա-արդյունաբերական միջազգային 8-րդ ցուցահանդեսը: ՀՀ
Էկոնոմիկայի եւ Արտաքին գործերի նախարարությունների,
Արդյունաբերողների եւ գործարարների միության աջակցությամբ
կազմակերպվող ցուցահանդեսին կմասնակցեն արդյունաբերական եւ
առեւտրային ավելի քան 120 ընկերություններ Հայաստանից եւ
արտերկրից:
Ինչպես հոկտեմբերի 7-ի ասուլիսում հայտնեց կենտրոնի գործադիր
տնօրեն Արա Ստեփանյանը, «ARMENIA EXPO»-ն տարածաշրջանում համարվում
է ամենախոշոր ցուցահանդեսներից մեկը, այդ իսկ պատճառով տարեցտարի
աճում է ցուցահանդեսին օտարերկրյա կազմակերպությունների
մասնակցության թիվը: Ա.Ստեփանյանի խոսքերով, ցուցահանդեսը
հնարավորություն է տալիս օտարերկրյա ընկերություններին Հայաստանում
գտնել լուրջ գործընկերներ:
Նա միաժամանակ նշեց, որ ի տարբերություն նախորդ տարիների, այս
տարի մասնակից ընկերությունների թիվը չի գերազանցի 120-ը, քանի որ
մարզադաշտի սրահները փոքր են: Հարցին, թե ինչու՞ ցուցահանդեսը չի
անցկացվում Կ.Դեմիրճյանի անվան մարզահամերգային համալիրում,
Ա.Ստեփանյանը նշեց, որ այդ հարցով պետք է դիմել համալիրի
տնօրինությանը: «Տնօրինության հետ ավելի քան 3 ամիս ընթացել են
բանակցություններ: Այդունքում բրենդային համարվող «DigiTec»-ն ու
«ARMENIA EXPO»-ն անցկացվում են ցուցահանդեսների համար ոչ
հարմարավետ վայրերում»,- ասաց Ա.Ստեփանյանը` հավելելով, որ իրենք
այդ հարցով բազմիցս դիմել են ՀՀ կառավարությանը, սակայն այն մինչ
օրս լուծում չի ստանում: Մինչդեռ, ըստ նրա, ամբողջ աշխարհում
գործարար կապերի 20-30%-ը հաստատվում է ցուցահանդեսների ժամանակ:
«ARMENIA EXPO»-ի շրջանակներում Կոմերցիայի,
արդյունաբերության եւ առեւտրի եվրոպական տնտեսական պալատը
Էկոնոմիկայի նախարարության աջակցությամբ հոկտեմբերի 15-ին
կկազմակերպի միջազգային կոնֆերանս` նվիրված սննդաարդյունաբերության
խնդիրներին, ինչպես նաեւ կքննարկվեն խմելու, հանքային ջրերի,
բնական եւ պահածոյացված պտուղ-բանջարեղենի եվրոպական շուկաներ
արտահանմանն ուղղված հարցեր: