ԵՐԵՎԱՆ, 2 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Արգենտինահայ գործարար
Էդուարդո Էռնեկյանի հրավերով առաջին անգամ Հայաստան է այցելել
արգենտինահայ հայտնի թենիսիստ Դավիթ Նալբանդյանը: Հոկտեմբերի 2-ին
«Մասթեր կլաս» թենիսի ակումբում տեղի ունեցավ նրա հանդիպումը
լրագրողների հետ: Ասուլիսին մասնակցեցին նաեւ Հայաստանի թենիսի
ֆեդերացիայի նախագահ Հարություն Փամբուկյանը, «Ֆրութֆուլ Արմենիա»
հիմնադրամի գործադիր տնօրեն Աննա-Քրիստինա Շիրինյանը, «Կոնվերս
բանկ» ՓԲԸ-ի գործադիր տնօրեն Արարատ Ղուկասյանը եւ «Մասթեր կլաս»
թենիսի ակումբի տնօրեն Աննա Գասպարյանը:
Դ.Նալբանդյանը խոսոտովանեց, որ վաղուց էր երազում լինել իր
նախնյաց երկրում, բայց ժամանակ չէր գտնում, քանի որ թենիսի
մրցաշարերը անընդհատ հաջորդում են իրար եւ իր գրաֆիկը խիստ
ծանրաբեռնված է: Նրա խոսքերով, ինքը հպարտ է հայ լինելու համար,
մտերիմ է Սարգիս Սարգսյանի ու Անդրե Աղասու հետ: Անվանի թենիսիստն
ասաց, որ իր նախնիները Մեծ եղեռնից հետո են հայտնվել
Արգենտինայում:
Դ.Նալբանդյանը նշեց, որ թենիսը բարդ խաղ է. բարձրակարգ
վարպետը պետք է բնածին օժտվածությունից բացի ունենա նաեւ
ֆիզիկական, մտավոր, բարոյակամային, ինչպես նաեւ տեխնիկա-տակտիկական
չափազանց բարձր որակներ: Թենիսում գրեթե անհնար է միայն
հաղթանակներ տանելը: Հաջողություններն ու ձախողումները այս
մարզաձեւում կողք-կողքի են:
Ասուլիսից հետո Դ.Նալբանդյանը «Մասթեր կլասի» գլխավոր կորտում
գործնական դասեր տվեց պատանի թենիսիստներին, ապա մրցեց Հարություն
Սոֆյանի հետ: Ի դեպ, նրանք 10 տարի առաջ` 1998-ին, էին հանդիպել
իրար` Մոսկվայի պատանեկան համաշխարհային խաղերին, եւ այն ժամանակ
հաղթել էր Դավիթը: Երեւանյան մրցամարտում նույնպես Դ.Նալբանդյանը
առավելության հասավ: