ԸՆԹԱՑԻԿ ՄՐՑԱՇՐՋԱՆՈՒՄ ՀԱՅԱՍՏԱՆԻ ԾԱՆՐՈՐԴՆԵՐԸ ՆՎԱՃԵԼ ԵՆ 55
ՄԵԴԱԼ
25-09-2008 17:00:00 | Հայաստան | Սպորտ
ԵՐԵՎԱՆ, 25 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: Լրագրողների հետ ՀՀ
սպորտի եւ երիտասարդության հարցերի փոխնախարար, ծանրամարտի
հանրապետական ֆեդերացիայի նախագահ Սամվել Խաչատրյանի, օլիմպիական
չեմպիոն Օգսեն Միրզոյանի եւ օրերս Ալբանիայի Դյուրես քաղաքում
անցկացված ծանրամարտի Եվրոպայի առաջնության մրցանակակիրների
սեպտեմբերի 25-ի հանդիպմանը ներկայացվեցին մրցաշրջան 2008-ի
արդյունքները:
Ֆեդերացիայի նախագահը մրցաշրջան գերազանց գնահատելով,
համեմատության համար նշեց, որ եթե 2006թ.-ին հայ ծանրորդները
միջազգային մրցումներում նվաճել են 46 մեդալ, 2007թ.-ին` 49-ը, ապա
այս տարի` 55 մեդալ: Ս.Խաչատրյանը կարեւորեց մարզիչների,
մարզիկների, մասնագետների համախմբված աշխատանքը:
Օ.Միրզոյանը նշեց, որ վերջին տարիներին գրանցված բարձր
արդյունքների շնորհիվ Հայաստանում մեծացել է ծանրամարտով
պարապողների թիվը: Ըստ նրա, հատկապես մեծացել է ծանրամարտով
զբաղվող աղջիկների քանակը. եթե 2006թ.-ին նրանք ընդամենը 7-ն էին,
ապա հիմա` 38-ը: Օ.Միրզոյանի խոսքերով, հայ աղջիկները արժանի
մրցակցություն են ծավալում միջազգային մրցահարթակներում եւ հաճախ
հաղթում են, այդ թվում եւ 2,5 մլն ծանրորդուհի ունեցող Չինաստանի
ներկայացուցիչներին:
Անդրադառնալով մարզաձեւի զարգացմանը խոչընդոտող
հանգամանքներին, Օ.Միրզոյանը նշեց, որ Երեւանում չկա բավարար
պայմաններով ապահովված ծանրամարտի մասնագիտացված մարզադպրոց: Չի
բավարարում նաեւ մարզագույքը:
Այս ամենի հետ մեկտեղ ասուլիսի մասնակիցները նշեցին, որ իրենց
նպատակն է պահպանել հաջողությունը եւ 2012թ.-ին Լոնդոնում
կայանալիք օլիմպիական խաղերում ավելի 1շատ մեդալներ նվաճել: