ԵՐԵՎԱՆՈՒՄ ԲԱՑՎԵՑ «ԼԻՏԵՐԱՏՈՒՐՆԱՅԱ ԳԱԶԵՏԱ» ԹԵՐԹԻ ԹՂԹԱԿՑԱԿԱՆ
ԿԵՏ
11-09-2008 20:10:00 | Հայաստան | Մշակույթ
ԵՐԵՎԱՆ, 9 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: Ռուսաստանի հետ
բարեկամության եւ համգործակցության ընկերության նախաձեռնությամբ,
Հայաստանում անցկացվող «Ռուսական խոսքի օրերի» շրջանակներում
Երեւանում է գտնվում «Լիտերատուրնայա գազետա» թերթի խմբագիր Յուրի
Պոլյակովը եւ խմբագրության մի շարք այլ աշխատակիցներ:
Սեպտեմբերի 11-ին Հայաստանի ժուռնալիստների միության
նախագահ Աստղիկ Գեւորգյանի հրավերով ռուսական այդ հանրաճանաչ ու
պատմական ավանդույթներ ունեցող թերթի պատասխանատուն հանդիպեց
հայկական ԶԼՄ-ների ներկայացուցիչների հետ: Յուրի Պոլյակովի
խոսքերով, արվեստի ու գրականության իսկական երկրպագուները
Ռուսաստանում արդեն գտել են իրենց հանդիսատեսին ու ընթերցողին:
«Դանդաղորեն կոմերցիոն միջոցառումներն սկսում են զիջել իրենց
դիրքերը` կորցնելով հանդիսատես: Իսկ իսկական արվեստի երկրպագուները
կրկին վերագտել են իրենց մշակութային օջախները»,- նշեց Յուրի
Պոլյակովը:
«Լիտերատուրնայա գազետա» թերթի տպաքանակը վերջին 7 տարվա
ընթացքում 23 հազարից հասել է 100 հազարի, ընդ որում, թերթի 6
հազար օրինակը տպագրվում է Ֆրանկֆուրտում եւ տարածվում եվրոպական
հատվածի ռուսալեզու ընթերցողի շրջանում: Բացի այդ, ավելի փոքր
տպաքանակով տպագրվում է նաեւ Վլադիվոստոկում:
Յուրի Պոլյակովը նշեց, որ արդեն վերականգնվել են խորհրդային
տարիների թերթի մի շարք ավանդույթներ, այդ թվում ազգային
գրականությանը հատկացված էջերը: «Ես կարծում եմ, որ այդ տարիներին
եղել են այնպիսի գրողներ, օրինակ` Հրանտ Մաթեւոսյանը, Սիլվա
Կապուտիկյանը, Չինգիզ Այթմատովը եւ այլք, որոնք հիմնարար
ազդեցություն են ունեցել այդ շջանի գրականության համար: Եվ
չպրոպագանդել նրանց այսօր սխալ է»,- նշեց թերթի խմբագիրը:
Նույն օրը, Հայստանի գրողների միությունում բացվեց
«Լիտերատուրնայա գազետա» թերթի հայաստանյան թղթակցական կետը:
Նշենք, որը «Լիտերատուրնայա գազետա» թերթը հիմնադրվել է 1830
թվականին մեծ պոետի` Ա.Ս.Պուշկինի կողմից: Հետագայում` 1929
թվականին, թերթը վերականգնեց ռուս մեկ այլ անվանի գրող` Մաքսիմ
Գորկին: