ԵՐԵՎԱՆ, 11 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: ՀՀ մշակույթի
նախարարության եւ Արվեստի քննադատների ազգային ասոցիացիայի
նախաձեռնությամբ, Հայաստանում սեպտեմբերի 11-ից սկսվեց «Արշիլ
Գորկու օրերը Հայաստանում» ծրագիրը` նվիրված նկարչի մահվան
60-ամյակին: Ծրագրի մեկնարկը տրվեց Էջմիածնում` Արշիլ Գորկու
թանգարանում, ուր ներկայացված են նկարչի կտավների վերարտադրված
աշխատանքները: Թանգարանի տնօրեն Շահեն Խաչատրյանի խոսքով, թեպետ
թանգարանը չի բացվել եւ մնում է ավարտել սրահի լուսավորման
աշխատանքները, սակայն «օրերի» մեկնարկը համաձայնել են սկսել
այստեղից` որպես Գորկու ժառանգության ապագա հավաքատեղի:
Թանգարանի շենքը կառուցվել է ուղիղ հարյուր տարի առաջ Խրիմյան
Հայրիկի նախաձեռնությամբ, որը պետք է ծառայեր որպես Վեհարանի
գանձարան: Սակայն այն որպես թանգարան երբեւէ չի ծառայել, այլ եղել
է որբերի ապաստանավայր, բուժական եւ ռազմական կենտրոն, պահեստ:
Ամենայն Հայոց Գարեգին Բ կաթողիկոսի օրոք այն վերականգնվել եւ
դարձել է թանգարան:
Ա.Գորկու քույրը նկարչի կտավները կտակել է Էջմիածնին: Գորկու
նկարները ներկայումս գտնվում են Պորտուգալիայի «Գյուլբենկյան»
թանգարանում: Այս պահին արդեն պայմանավորվածություն է ձեռք բերվել
Գորկու 53 աշխատանքների բնօրինակները Երեւան բերելու եւ
թանգարանում պահվելու համար: Այժմ Էջմիածնի թանգարանում միայն մեկ
բնօրինակ է պահվում Գորկու գծանկարներից: Նշենք, որ Գորկու գործերի
մեծ մասը գտնվում է Միացյալ Նահանգների տարբեր թանգարաններում:
Արվեստի քննադատների ազգային ասոցիացիայի նախագահ Նազարեթ
Կարոյանի խոսքով, իրականացվելիք մեկշաբաթյա ծրագիրը նպատակ ունի
հայ հասարակայնությանը հաղորդակից դարձնել Գորկու արվեստին,
ժառանգությանը: Գորկու գեղանկարչության ուղղությունը` աբստրակտ
էքսպրեսիոնիզմը, հետագայում մեծ ազդեցություն է ունցել շատ
նկարիչների վրա:
Սեպտեմբերի 12-ին Ազգային պատկերասրահում կանցկացվի «Արշիլ
Գորկին եւ Հայաստանը» խորագրով գիտաժողով, որին կմասնակցեն հայ եւ
օտարազգի պատմաբաններ, արվեստի քննադատներ, Գորկու
ստեղծագործության գիտակներ: