ԱՊԱՏԵՂԵԿԱՏՎՈՒԹՅՈՒՆԻՑ ԽՈՒՍԱՓԵԼՈՒ ՆՊԱՏԱԿՈՎ ԱՐԹՈՒՐ ԱԲՐԱՀԱՄԸ
ՄՏԱԴԻՐ Է ՀԱՅԱՍՏԱՆՈՒՄ ՀԻՄՆԵԼ ԻՐ ՏԵՂԵԿԱՏՎԱԿԱՆ ԿԵՆՏՐՈՆԸ
28-06-2008 17:36:00 | Հայաստան | Սպորտ
ԵՐԵՎԱՆ, 28 ՀՈՒՆԻՍԻ, ՆՈՅՅԱՆ ՏԱՊԱՆ: IBF վարկածով աշխարհի
չեմպիոն Արթուր Աբրահամը մտադիր է Հայաստանում հիմնել իր
տեղեկատվական կենտրոնը: Այս մասին հունիսի 28-ին «ՆՈՅՅԱՆ ՏԱՊԱՆ»-ի
թղթակցին հայտնեց Ա.Աբրահամը, պարզաբանելով, որ տեղեկատվական
կենտրոնի ստեղծմամբ հնարավոր կլինի խուսափել իր անձին առնչվող
ապատեղեկատվությունից:
Ա.Աբրահամը հայաստանյան լրատվամիջոցների կողմից տարածած այն
տեղեկատվությունը, թե իբր ինքը բռնաբարությություն է գործել,
գնահատեց որպես «ակնհայտ կեղծ տեղեկատվություն»: Նա նշեց, որ
հայկական լրատվամիջոցները սխալ թարգմանության պատճառով
ապատեղեկատվություն էին տարածել` հարկ չհամարելով իր հետ ճշտել
տեղեկատվության իսկությունը: «Մենք ամեն ինչ անում ենք արտերկրում
մեր երկրի հեղինակությունը բարձր պահելու համար, իսկ մեր հայկական
լրատվամիջոցները, ցավոք, ամեն ինչ անում են մեզ մեր հայրենիքում
վարկաբեկելու համար»,- ասաց Ա.Աբրահամը:
Նա հայտնեց նաեւ, որ հունիսի 30-ին իրեն կտրամադրվի իր նոր
գոտին` վերջերս գողացվածի փոխարեն: