ԶԻՄԲԱԲՎԵԻ ՈՍՏԻԿԱՆՈՒԹՅՈՒՆԸ ՁԵՐԲԱԿԱԼԵԼ Է «ՆՅՈՒ ՅՈՐՔ ԹԱՅՄՍ»
ԹԵՐԹԻ ԹՂԹԱԿՑԻՆ
04-04-2008 15:17:00 | Զիմբաբվե | Միջազգային
ՀԱՐԱՐԵ, 4 ԱՊՐԻԼԻ, ՆՈՅՅԱՆ ՏԱՊԱՆ: Զիմբաբվեի ոստիկանությունը
երկու արտասահմանցի լրագրողի է ձերբակալել առանց հավատարմագրման
աշխատելու մեղադրանքով: Թղթակիցներից մեկը «Նյու Յորք թայմս» թերթի
աշխատակից, Աֆղանստանի պատերազմի մասին ռեպորտաժների համար 2002
թվականի Պուլիտցերյան մրցանակի դափնեկիր Բարրի Բիրաքն է: Երկրորդ
լրագրողի անունը եւ հպատակությունը առայժմ անհայտ է:
Ոստիկանության ներկայացուցիչը հաստատել է մայրաքաղաք
Հարարեում հինգշաբթի երեկոյան արտասահմանցի լրագրողների
ձերբակալման մասին տեղեկությունը` հայտնելով, որ նրանք
կալանավորված են: Նա ասել է, որ թղթակիցներին հարցաքննում են առանց
համապատասխան արտոնության աշխատելու առնչությամբ:
Զիմբաբվեի իշխանությունները արտասահմանյան ԶԼՄ-ների մեծ մասի
ներկայացուցիչներին թույլ չեն տվել լուսաբանել համընդհանուր
ընտրությունները: Նրանք նախազգուշացրել էին, որ ամենակոշտ
միջոցներն են ձեռնարկելու բոլոր նրանց դեմ, ովքեր կփորձեն ապօրինի
ձեւով երկիր թափանցել: