ԱՄՆ-Ն ՉԻ ԿԱՄԵՆՈՒՄ ԼԱՐՎԱԾՈՒԹՅԱՆ ՈՒԺԵՂԱՑՈՒՄ ՌՈՒՍԱՍՏԱՆԻ ՀԵՏ
ՀԱՐԱԲԵՐՈՒԹՅՈՒՆՆԵՐՈՒՄ
08-11-2007 17:26:00 | ԱՄՆ | Միջազգային
ՎԱՇԻՆԳՏՈՆ, 8 ՆՈՅԵՄԲԵՐԻ, ՆՈՅՅԱՆ ՏԱՊԱՆ: ԱՄՆ-ն չի ցանկանում
լարվածությունն ուժեղացնել Ռուսաստանի հետ հարաբերություններում:
Այս մասին գերմանական հեռուստատեսությանը տված հարցազրույցում
հայտարարել է ԱՄՆ-ի նախագահ Ջորջ Բուշը:
«Ես ուզում եմ գերմանական հասարակությանը հավաստիացնել, որ ես
չեմ ցանկանում լարվածության ուժեղացում Ռուսաստանի հետ»,- ասել է
ամերիկյան վարչակազմի ղեկավարը:
Դրա կապակցությամբ նա նորից է կրկնել, որ հակահրթիռային
պաշտպանության ամերիկյան համակարգը, որի տարրեր Վաշինգտոնը
ծրագրում է տեղակայել Եվրոպայում, ուղղված չէ Ռուսաստանի դեմ: Այն
խոսակցությունները, որ ամերիկյան ՀՀՊ-ն կարող է ինչ-որ ձեւով
սպառնալ Ռուսաստանի անվտանգությանը, Բուշն անվանել է «անհեթեթ»:
Բուշը խոստովանել է, որ ԱՄՆ-ի եւ Ռուսաստանի միջեւ պահպանվում
են տարաձայնությունները, այդ թվում Իրանի դեմ պատժամիջոցների
հարցում: «Կան հարցեր, որտեղ մենք տարակարծիք ենք»,- ասել է նա:
Այդուամենայնիվ, ԱՄՆ-ի նախագահը այն համոզմունքն է հայտնել, որ
իրանական միջուկային խնդիրը կարելի է լուծել դիվանագիտական
միջոցներով: