ՇԱԽՄԱՏԻ ԵՎՐՈՊԱՅԻ ԹԻՄԱՅԻՆ ԱՌԱՋՆՈՒԹՅՈՒՆՈՒՄ ՀԱՅԱՍՏԱՆԻ
ՏՂԱՄԱՐԴԿԱՆՑ ՀԱՎԱՔԱԿԱՆԸ ՀԱՂԹԵՑ ԹՈՒՐՔԻԱՅԻ, ԻՍԿ ԿԱՆԱՆՑԸ` ԱԴՐԲԵՋԱՆԻ
ԹԻՄԻՆ
02-11-2007 18:35:00 | Հայաստան | Սպորտ
ՀԵՐԱԿԼԻՈՆ, 2 ՆՈՅԵՄԲԵՐԻ, ՆՈՅՅԱՆ ՏԱՊԱՆ: Հունաստանի Հերակլիոն
քաղաքում անցկացվող շախմատի Եվրոպայի թիմային առաջնությունում
նոյեմբերի 1-ին կայացան 5-րդ փուլի հանդիպումները: Հայաստանի
տղամարդկանց հավաքականը 2,5:1,5 հաշվով հաղթեց Թուրքիայի թիմին,
վաստակեց 7 միավոր եւ բաժանում է 5-10-րդ տեղերը: Իսկ միանձնյա
առաջատարը 10 միավորով Ռուսաստանի հավաքականն է:
Հայաստանի շախմատիստուհիները նույն` 2,5:1,5, հաշվով
պարտության մատնեցին Ադրբեջանի թիմին եւ 6 միավորով բաժանում են
7-14-րդ տեղերը: Մրցաշարային աղյուսակը 9 միավորով գլխավորում է
Լեհաստանի թիմը:
Նոյեմբերի 2-ին առաջնությունում խաղադադար է հայտարարված, իսկ
նոյեմբերի 3-ին Հայաստանի տղամարդկանց եւ կանանց հավաքականները
սեւերով կմրցեն, համապատասխանաբար, Ռումինիայի եւ Հունգարիայի
թիմերի հետ: