ՊՐԱՀԱ, 26 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Չեխիայի խորհրդարանի ստորին պալատը, որտեղ տեղի է ունենում հիմնական օրինաստեղծ գործընթացը, մերժել է հանրապետությունում ԱՄՆ-ի ՀՀՊ ռադիոտեղորոշման կայանի տեղաբաշխման հարցով հանրաքվեի անցկացման օրինագիծը: Ընդդիմությանը` սոցիալ-դեմոկրատներին եւ կոմունիստներին, չի հաջողվել անհրաժեշտ թվով ձայներ հավաքել ի պաշտպանություն օրինագծի: Նիստին ներկա գտնվող 144 խորհրդարանականներից դեմ են քվեարկել ժողովրդի 57 ընտրյալներ: Իսկ օրինագծի ընդունման համար անհրաժեշտ էր առնվազն 120 պատգամավորների աջակցությունը: Բնակչության հարցումների համաձայն, հանրաքվեի անցկացում է պահանջում չեխ քաղաքացիների 70 տոկոսից ավելին: Այդ կապակցությամբ ընդդիմությունը կառավարությանը մեղադրում է համաքաղաքացիների մեծ մասի շահերն արհամարհելու մեջ:

---