ՌՈՒՍԱՍՏԱՆԸ ԵՎ ԱՄՆ-Ն ՀԱՄԱՁԱՅՆՈՒԹՅՈՒՆ ՁԵՌՔ ՉԵՆ ԲԵՐԵԼ ՀՀՊ
ՀԱՐՑԵՐԻ ԱՌՆՉՈՒԹՅԱՄԲ
12-10-2007 20:26:00 | Ռուսաստան | Միջազգային
ՄՈՍԿՎԱ, 12 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Ռուսաստանը եւ ԱՄՆ-ն
«երկու գումարած երկու» ձեւաչափով Մոսկվայում կայացած
կոնսուլտացիաների ընթացքում համաձայնության չեն հասել
հակահրթիռային պաշտպանության (ՀՀՊ) հարցերի առնչությամբ,
բանակցություններից հետո հայտարարել է ԱՄՆ պետքարտուղար Քոնդոլիզա
Ռայսը:
«Հակահրթիռային պաշտպանության, ինչպես նաեւ միջուկային
մարտագլխիկների տեղաբաշխման հարցերի շուրջ, որ նախատեսված են
Մոսկովյան պայմանագրով, համաձայնություն ձեռք չբերվեց, բայց մենք
եկանք այն եզրահանգման, որ մեր փորձագետները պետք է ըստ կարելվույն
շուտ քննության առնեն այդ հարցերը»,- ասել է նա «երկու գումարած
երկու» (ՌԴ ԱԳ ղեկավար, ԱՄՆ պետքարտուղար, Ռուսաստանի եւ ԱՄՆ-ի
պաշտպանության նախարարներ) ձեւաչափով հանդիպման արդյունքներին
նվիրված մամլո ասուլիսի ընթացքում:
«Ինչ վերաբերում է Լեհաստանին եւ Չեխիայի Հանրապետությանը,
ապա մենք շարունակում ենք աշխատանքն այդ ուղղությամբ եւ,
բնականաբար, այդ աշխատանքում մենք այժմ կընդգրկենք ռուսական կողմի
մտահոգությունները»,- ավելացրել է Ռայսը:
Նշվում է, որ ճեպասուլիսում ՌԴ ԱԳՆ ղեկավար Սերգեյ Լավրովը
հայտնել է, որ «երկու գումարած երկու» ձեւաչափով Ռուսաստանի եւ
ԱՄՆ-ի կոնսուլտացիաները կշարունակվեն «մոտ կես տարի անց Միացյալ
Նահանգներում»: