ՆԱԽԱՏԵՍՎՈՒՄ Է ԿՆՔԵԼ ՀԱՄԱՁԱՅՆԱԳԻՐ ՄՇԱԿՈՒՅԹԻ ՈԼՈՐՏՈՒՄ
ՀԱՅ-ՍԼՈՎԱԿՅԱՆ ՀԱՄԱԳՈՐԾԱԿՑՈՒԹՅԱՆ ՄԱՍԻՆ
12-10-2007 18:35:00 | Հայաստան | Մշակույթ
ԵՐԵՎԱՆ, 12 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Նախատեսվում է, որ
նոյեմբերի վերջին Երեւան կայցելի Սլովակիայի մշակույթի նախարար
Մարեկ Մադյարիչը, որը ՀՀ մշակույթի նախարար Հասմիկ Պողոսյանի հետ
կստորագրի համաձայնագիր մշակույթի ոլորտում հայ-սլովակյան
համագործակցության վերաբերյալ: Այս մասին «ՆՈՅՅԱՆ ՏԱՊԱՆ»-ի
թղթակցին հայտնեց Սլովակիայի հայ համայնքի ղեկավար Աշոտ
Գրիգորյանը:
Նրա խոսքերով, փաստաթղթով կնախանշվեն Սլովակիայի 1-ին
հեռուստաալիքի եւ Հայաստանի հանրային ռադիոհեռուստաընկերության
միջեւ համագործակցության շրջանակաները հեռուստահաղորդումների
փոխանակության եւ համատեղ ֆիլմարտադրության ոլորտում: Նշվեց, որ
Սլովակիայի 1-ին հեռուստաալիքը լայն լսարան ունի նաեւ Չեխիայում եւ
Լեհաստանում:
Ա.Գիգորյանը հայտնեց նաեւ, որ նախատեսում է իր միջոցներով
մինչեւ 15 մլն եվրո ընդհանուր չափով վարկային գծեր բացել
հայ-սլովակյան մշակութային նախագծերը ֆինանսավորելու նպատակով: