ՀԱՅ-ԲԵԼԱՌՈՒՍԱԿԱՆ ԱՊՐԱՆՔԱՇՐՋԱՆԱՌՈՒԹՅՈՒՆԸ ԱՃԻ ՄԻՏՈՒՄ ՈՒՆԻ
18-09-2007 20:00:00 | Հայաստան | Տնտեսություն
ԵՐԵՎԱՆ, 18 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: Առեւտրաշրջանառության
ծավալներով Բելառուսի գործընկեր նախկին խորհրդային երկրների
շարքում Հայաստանը զբաղեցնում է յոթերորդ տեղը: Այս մասին
սեպտեմբերի 18-ին հանդիպմանը հայտնեց այցով Հայաստանում գտնվող
Բելառուսի Առեւտրաարդյունաբերական պալատի նախագահ Վլադիմիր
Բոբրովը: Ըստ նրա, 2007թ.-ի հունվար-հուլիսին հայ-բելառուսական
ապրանքաշրջանառության ծավալները կազմել են 15,7 մլն ԱՄՆ դոլար`
ամբողջ 2006թ.-ի 21,3 մլն դոլարի դիմաց:
Վ.Բոբրովի խոսքերով, Բելառուսի գործարարները հեռանկարային են
համարում համագործակցությունը խմիչքների արտադրության,
տեղեկատվական եւ հեռահաղորդակցության տեխնոլոգիաների ոլորտներում:
Նա նշեց, որ Հայաստանից Բելառուս են արտահանվում մրգահյութեր,
կոնյակ, գինի, ապակե տարաներ, դեղորայք, հանքային ջրեր, իսկ
Բելառուսից ներկրվում են սառնարաններ, բեռնատար մեքենաներ,
տրակտորներ, ավտոմասեր, տրիկոտաժ, շինանյութ, կահույք եւ այլն:
ՀՀ ԱԱՊ-ի նախագահ Մարտին Սարգսյանի խոսքերով, թեպետ
տրանսպորտային լուրջ խնդիրները հնարավորություն չեն տալիս
իրագործելու մի շարք համատեղ ծրագրեր, այնուամենայնիվ
հայ-բելառուսական տնտեսական համագործակցության հրաշալի օրինակներ
կան: Նա միաժամանակ հույս հայտնեց, որ նմանօրինակ հանդիպումները
կնպաստեն համագործակցության ոլորտների ընդլայնմանը:
Նշենք, որ երկու երկրների ԱԱՊ-երի միջեւ համագործակցությունը
սկսվել է 2002թ.-ին` համապատասխան համաձայնագրի կնքմամբ:
Նշենք նաեւ, որ ըստ պաշտոնական վիճակագրության, 2007թ.-ի
առաջին 7 ամիսներին Հայաստանից Բելառուս արտահանման ծավալները
կազմել են 1,7 մլն ԱՄՆ դոլար (ամբողջ 2006թ.-ին` 3,8 մլն դոլար),
իսկ ներմուծման ծավալները` 14 մլն դոլար (ամբողջ 2006թ.-ին 17,5
մլն դոլար): Առեւտրային հաշվեկշռի բացասական սալդոն 2006թ.-ին
կազմել է ավելի քան 13 մլն ԱՄՆ դոլար: