ԴԱՄԱՍԿՈՍ, 6 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: Իսրայելի ռազմաօդային ուժերը ռմբակոծել են Սիրիայի տարածքը, իսկ վերջինս բացել է պատասխան կրակ: Այս մասին հաղորդում է սիրիական «SANA» գործակալությունը: Ըստ տեղեկությունների, միջադեպը տեղի է ունեցել սեպտեմբերի 5-ի գիշերը: Սիրայի հակաօդային պաշտպանության ուժերը կրակ են բացել իսրայելական ռազմական ինքնաթիռների ուղղությամբ, երբ վերջիններս խախտել են Սիրիայի օդային տարածքը: «Մենք զգուշացնում ենք թշնամի Իսրայելի կառավարությանը նման բացահայտ ագրեսիայի համար»,- հայտարարել է Սիրիայի բանակի մամլո խոսնակը: Նշվում է նաեւ, որ ռմբակոծությունների հետեւանքով զոհեր կամ վիրավորներ չեն գրանցվել: Ըստ տեղեկությունների, Իսրայելի պաշտպանության բանակի մամլո ծառայությունից հայտարարել են, որ Իսրայելը պաշտոնապես չի մեկնաբանի սիրիական լրատվամիջոցների` իսրայելական ռազմաօդային ուժերի կողմից Սիրիայի օդային սահմանը խախտելու մասին լուրերը. «Մեր ռեակցիան հետեւյալն է` մենք չենք մեկնաբանում նման հայտարարությունները»,- նշել է բանակի մամլո ծառայության ներկայացուցիչը:

---