ՀՀ ՎԱՐՉԱՊԵՏԸ ԿԱՐԵՎՈՐԵԼ Է ՃԱՐՏԱՐԱՊԵՏԱՇԻՆԱՐԱՐԱԿԱՆ ԲԱՐՁՐԱԳՈՒՅՆ
ԿՐԹՈՒԹՅԱՄԲ ՈՐԱԿՅԱԼ ՄԱՍՆԱԳԵՏՆԵՐԻ ՊԱՏՐԱՍՏՄԱՆ ԽՆԴԻՐԸ
03-09-2007 18:30:00 | Հայաստան | Հասարակություն
ԵՐԵՎԱՆ, 3 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: ՀՀ վարչապետ Սերժ
Սարգսյանը սեպտեմբերի 3-ին Երեւանի Ճարտարապետության եւ
շինարարության պետական համալսարանում ծանոթացել է ուսման համար
ստեղծված նոր պայմաններին, ինչպես նաեւ դեռեւս առկա խնդիրներին,
այցելել բուհի վերանորոգված համակարգչային նախագծման ֆակուլտետ:
Այնուհետեւ ՀՀ կրթության եւ գիտության նախարարի
մասնակցությամբ համալսարանի ղեկավարության եւ պրոֆեսորադասախոսական
անձնակազմի հետ վարչապետը քննարկել ճարտարապետաշինարարական
կրթության զարգացման հարցերը: Ինչպես «ՆՈՅՅԱՆ ՏԱՊԱՆ»-ին հայտնեցին
ՀՀ կառավարության Տեղեկատվության եւ հասարակայնության հետ կապերի
վարչությունից, քննարկմանը մասնակցել են նաեւ Շինարարների եւ
Ճարտարապետների միությունների նախագահները:
Ս.Սարգսյանը ներկայացրել է ՀՀ կառավարության որդեգրած
քաղաքականությունը կրթության եւ գիտության բնագավառներում, որոնք
ամրագրված են կառավարության գործունեության ծրագրում: Վարչապետը
անդրադարձել է նաեւ տնտեսության գերակա ճյուղերում այսօր մեծ
պահանջարկ ունեցող մասնագիտությունների գծով բուհերում որակյալ
կադրերի պատրաստման խնդիրներին, ավելի հանգամանորեն խոսելով
հատկապես տվյալ բուհից պետության ակնկալիքների եւ ըստ այդմ` բուհի
առջեւ դրված խնդիրների մասին:
Ելնելով այն բանից, որ հանրապետության տնտեսության համախառն
ներքին արդյունքում շինարարությունն զգալի տեղ է զբաղեցնում եւ
քաղաքաշինական ծրագրերի տարեցտարի ընդլայնվող ծավալներով
պայմանավորված ՀՆԱ-ի կառուցվածքում առաջիկա տարիներին եւս
շինարարության կշիռը մեծ է լինելու, Ս.Սարգսյանը կարեւորել է
բարձրակարգ, որակյալ մասնագետների պատրաստմամբ եղած պահանջարկը
բավարարելու խնդիրը: Նա նշել է, որ այսօր հանրապետությունում
հատկապես բարձրագույն կրթությամբ այդպիսի մասնագետների մեծ
պահանջարկ կա:
Վարչապետը հայտնել է է, որ ՀՀ պետական բյուջեում
յուրաքանչյուր տարի զգալիորեն ավելացվելու է կրթությանը եւ
գիտությանը տրամադրվող ֆինանսավորումը: Միաժամանակ Ս.Սարգսյանը
նշել է, որ չափազանց կարեւոր է այդ միջոցների ծախսման
արդյունավետության մեծացումը, բարեփոխումների արդյունքում
կրթության որակի բարձրացումն ու աշխարհի առաջատար փորձի վրա
հիմնված եւ պահանջարկված, տնտեսության մեջ կիրառելի գիտության
զարգացման ուղղությամբ աշխատանքը: