ԸՍՏ ԹԱԹՈՒԼ ՄԱՆԱՍԵՐՅԱՆԻ, ԿԱՌԱՎԱՐՈՒԹՅՈՒՆԸ «ՈՐԵՎԷ ԼՈՒՐՋ ՔԱՅԼ»
ՉԻ ԱՆՈՒՄ ՏՏ-Ի ՈԼՈՐՏԻ ԶԱՐԳԱՑՄԱՆ ՀԱՄԱՐ
30-08-2007 21:30:00 | Հայաստան | Տնտեսություն
ԵՐԵՎԱՆ, 30 ՕԳՈՍՏՈՍԻ, ՆՈՅՅԱՆ ՏԱՊԱՆ: Հայաստանը խոցելի երկիր է
տեղեկատվական անվտանգության առումով: Այս մասին օգոստոսի 30-ին
Ռազմավարական եւ ազգային հետազոտությունների հայկական կենտրոնի
կազմակերպած «Հայաստանում ժամանակակից կապի համակարգի
արդյունավետությունը» թեմայով սեմինար-քննարկման ժամանակ
հայտարարեց տնտեսագետ Թաթուլ Մանասերյանը: Նրա խոսքերով,
կառավարությունը, տեղեկատվական տեխնոլոգիաների (ՏՏ) ոլորտը
հռչակելով որպես տնտեսության գերակա ճյուղ, «որեւէ լուրջ քայլ» չի
անում ՏՏ-ի զարգացման համար:
Անդրադառնալով Հայաստանում տեղեկատվական անվտանգությանն
առնչվող խնդիրներին, տնտեսագետը նշեց, որ տեղեկատվական
անվտանգությունն ուղղակիորեն կապված է ազգային անվտանգության հետ:
Տեղեկատվական անվտանգության սպառնալիքներից Թ.Մանասերյանն
առանձնացրեց պետական բոլոր կառույցների, մասնավորապես, Ազգային
Ժողովի եւ կառավարության ինտերնետային կայքերում առկա բազմաթիվ
համակարգչային վիրուսները:
Թ.Մանասերյանի համոզմամբ, ՏՏ ոլորտը չպետք է դիտարկել որպես
առանձին ճյուղ, քանի որ այն պայմանավորում է եւ որոշիչ
ազդեցություն ունի տնտեսության բոլոր ոլորտների վրա: «Եթե ՏՏ-ի
ոլորտը բավարար մակարդակի վրա չէ, մենք չենք կարող ակնկալել,
օրինակ, տնտեսության մրցունակության բարձրացում»,- նշեց նա: