ՀԱՅԱՍՏԱՆԻՑ ԵՎՐՈԴԱՏԱՐԱՆ ՆԵՐԿԱՅԱՑՎԱԾ ԴԻՄՈՒՄՆԵՐԻ ԹԻՎԸ ՄԻ ՔԱՆԻ
ՏԱՍՆՅԱԿՈՎ ՆՎԱԶԵԼ Է
22-08-2007 16:30:00 | Հայաստան | Հասարակություն
ԵՐԵՎԱՆ, 22 ՕԳՈՍՏՈՍԻ, ՆՈՅՅԱՆ ՏԱՊԱՆ: Հայաստանի քաղաքացիների
կողմից Մարդու իրավունքների եվրոպական դատարանին ուղղված
դիմումները մի քանի տասնյակով նվազել են: Այս մասին օգոստոսի 22-ին
Երեւանում անցկացվող «Մարդու իրավունքների պաշտպանության եվրոպական
կոնվենցիայի դրույթների կիրառումը իրավապահ մարմինների
գործունեության ընթացքում» թեմայով սեմինարի ժամանակ նշեց
Եվրոդատարանի դատավոր Ալվինա Գյուլումյանի: Այդ նվազումը, նրա
ենթադրությամբ, հետեւանք է այն բանի, որ օբյեկտիվ պատճառներով
դիմումների քննությունը դատարանում 2-3 տարով ձգձգվում է: Նշվեց,
որ Հայաստանից ուղարկված եւ դեռեւս վերջնական ընթացք չստացած
դիմումների թիվը չի անցնում 200-ից: Իսկ ընդհանուր առմամբ, ըստ
Ա.Գյուլումյանի, ներկայումս դատարանում կան մոտ 90 հազար չքննված
գործեր:
Նշվեց, որ 2003թ.-ից հետո Հայաստանից Եվրոպական դատարան
ներկայացված դիմումների առաջին խմբում մեծ թիվ էին կազմում
հանրահավաքներին, խաղաղ ցույցերին մասնակցելու իրավունքի
խախտումներին, արդար դատաքննության իրավունքի խախտումներին
վերաբերող գործերը: Փոքր թիվ են կազմում դատարանի պրակտիկայում ոչ
հաճախ հանդիպող մամուլի ազատության խախտմանը վերաբերող դիմումները,
այդ թվում ստացված «Մելտեքս», «Նոյյան Տապան» ՍՊԸ-ների կողմից:
Ըստ Եվրոդատարանի դատավոր Էգրեր Մայերի, երկրների այն
տասնյակը, որտեղից դատարանը ստացել է դիմումների 79 տոկոսը,
գլխավորում է Ռուսաստանը. նրա դեմ ներկայացված դիմումները կազմում
են դիմումների ընդհանուր թվի 21 տոկոսը: Իսկ միայն անցած տարի այդ
երկրի դեմ ներկայացվել է 10 հազար դիմում: Թուրքիայի դեմ
ներկայացված դիմումները կազմում են ընդհանուրի 10 տոկոսը: Երկրների
տասնյակի մեջ են մտնում նաեւ Ուկրաինան, Լեհաստանը, Ֆրանսիան,
Գերմանիան, Չեխիան, Իտալիան, Մեծ Բրիտանիան եւ Բուլղարիան:
Նշվեց նաեւ, որ Եվրոդատարան ներկայացված մոտ 50 հազար
դիմումները անհատների կողմից ներկայացված դիմումներ են.
բացառություն է կազմում Վրաստանն ընդդեմ Ռուսաստանի դիմումը: