ԻՐԱՆՆ ՍԿՍԵԼ Է ՍԵՓԱԿԱՆ ՄՇԱԿՄԱՆ ԵՐԿՐՈՐԴ ԿՈՐԾԱՆԻՉԻ
ԱՐՏԱԴՐՈՒԹՅՈՒՆԸ
07-08-2007 17:42:00 | Իրան | Միջազգային
ԹԵՀՐԱՆ, 7 ՕԳՈՍՏՈՍԻ, ՆՈՅՅԱՆ ՏԱՊԱՆ: Իրանը հայտարարել է նոր
նմուշի «Ազարակշ» («Կայծակ») հայրենական կործանիչի սերիական
արտադրությունն սկսելու մասին: Սա իրանցի ինժեներների ստեղծած
արդեն երկրորդ մարտական ինքնաթիռն է, որը կհամալրի Իսլամական
հանրապետության բանակի սպառազինությունը: Ավելի վաղ հաջողությամբ
փորձարկվել էր «Սաեգե» («Որոտ») կործանիչ-ռմբակոծիչը:
Իրանակա IRNA գործակալությունը խոստովանում է, որ «Սաեգեն» եւ
«Ազարակշը» ամերիկյան F-5 եւ F-18 կործանիչների անալոգներն են:
Սակայն միաժամանակ ընդգծվում է, որ այս մարտական մեքենաները
վերամշակվել եւ ստեղծվել են Իրանում: Օգոստոսի 6-ին Իրանի պետական
հեռուստատեսությամբ, վկայակոչելով պաշտպանության նախարարին,
հայտարարվել է «Սաեգե» եւ «Ազարակշ» ինքնաթիռների սերիական
արտադրությունն սկսելու մասին:
Թեհրանում պնդում են, որ Իրանը ոչ միայն լրիվ անկախ է զենքի
արտասահմանյան մատակարարներից, այլեւ սեփական արտադրության
սպառազինություն է մատակարարում աշխարհի համարյա 60 երկրների`
տարեկան ավելի քան 100 միլիոն դոլար գումարի չափով: