ԲՐՅՈՒՍԵԼ, 25 ՀՈՒՆԻՍԻ, ՆՈՅՅԱՆ ՏԱՊԱՆ: Եվրամիությունը
2007-2009թթ. տնտեսական օգնության ծրագրի շրջանակում Միության
թեկնածու եւ հավանական թեկնածու պետություններին կտրամադրի 3,961
միլիարդ եվրո:
Այս ծրագրի համաձայն, երկու տարվա ընթացքում Խորվաթիան կստանա
438,5 միլիոն եվրո, Մակեդոնիան` 210,4, Ալբանիան` 212,9, Բոսնիա-
Հերցեգովինան` 226, Չերնոգորիան` 97,3 եւ Սերբիան` 572,4 մլն եվրո:
Գումարները նախատեսվում է ծախսել այդ պետություններում` տնտեսական
եւ սոցիալական աճի ապահովման, ինչպես նաեւ ԵՄ օրենսդրությունը
կյանքի կոչելու եւ Միության չափանիշներին մոտ կանգնելու համար:
Ըստ ծրագրի, 199,1 միլիոն եվրո էլ կստանա Կոսովոն:
Ֆինանսական օգնության առյուծի բաժինը` 1,602 միլիարդ եվրո,
կստանա Թուրքիան, ինչը նախատեսվում է տրամադրել երկրում մարդու
իրավունքների եւ ազատությունների, ժողովրդավարության զարգացման ու
ազգային փոքրամասնությունների իրավունքների պաշտպանության
բնագավառներին:
Դրանից բացի, 2007-09թթ. 402,7 մլն եվրո էլ կտրամադրվի
տարածաշրջանային համագործակցության, տնտեսության եւ առեւտրի,
կրթության, երիտասարդության եւ այլ բնագավառներում ծրագրերի
իրագործմանը: