ԼՈՒՅՍ Է ՏԵՍԵԼ ՍԱՀԱԿ ՎՐԴ. ՄԱՇԱԼՅԱՆԻ «ԵՐԿՈՒ ՈՒԽՏԱՎՈՐ» ՎԵՊԻ
ԱՌԱՋԻՆ ԵՐԿՈՒ ՄԱՍԵՐԸ
13-06-2007 19:55:00 | Հայաստան | Հասարակություն
ԷՋՄԻԱԾԻՆ, 13 ՀՈՒՆԻՍԻ, ՆՈՅՅԱՆ ՏԱՊԱՆ: Մայր Աթոռ Ս.Էջմիածնի
հրատարակչական բաժինը Գարեգին Բ Ամենայն հայոց կաթողիկոսի
օրհնությամբ լույս է ընծայել Սահակ վարդապետ Մաշալյանի «Երկու
ուխտավոր» եռամասնյա վեպի առաջին եւ երկրորդ մասերը: Վեպը
հրատարակվել է Մխիթար Հերացու անվան բժշկական համալսարանի
մեկենասությամբ:
Ինչպես «ՆՈՅՅԱՆ ՏԱՊԱՆ»-ին հայտնեցին Մայր Աթոռ Ս.Էջմիածնի
Տեղեկատվական համակարգից, գիրքը նվիրված է հայ եկեղեցու 18-րդ դարի
երկու կարկառուն դեմքեր Հովհաննես Կոլոտ եւ Գրիգոր Շղթայակիր
պատրիարքներին, որոնք իրենց առաքելությամբ անմոռանալի հետք են
թողել հայ ժողովրդի ազգային պատմության վրա: Հրաշագործ Վարդան
վարդապետին աշակերտած այս երկու վանականների կյանքը մեծ դասեր է
պարունակում բոլոր ժամանակների հավատացյալ ուխտավորների համար:
Գեւորգյան հոգեւոր ճեմարանի փոխտեսուչ Սահակ վրդ. Մաշալյանը
ընթերցողին է մատուցում հետաքրքրական մի պատմավեպ, որը նորություն
է մեր կրոնական գրականության համար` իր միստիկական սխրանքով եւ
երեւակայական պատկերազարդումներով:
Վեպը սկզբնապես գրվել է արեւմտահայերեն եւ արեւելահայերենի
վերածվել է Հրատարակչական բաժնի կողմից: