ԵՐԵՎԱՆՈՒՄ 2 ՓՈԽԱՆԱԿՄԱՆ ԿԵՏԵՐԻ ՎՐԱ ԱՎԱԶԱԿԱՅԻՆ ՀԱՐՁԱԿՄԱՆ
ՓԱՍՏՈՎ ՔՐԵԱԿԱՆ ԳՈՐԾԻ ԴԱՏԱՎՃՌՈՎ 2 ԱՆՁԻՆՔ ԴԱՏԱՊԱՐՏՎԵՑԻՆ ՑՄԱՀ
ԱԶԱՏԱԶՐԿՄԱՆ
04-06-2007 19:40:00 | Հայաստան | Հասարակություն
ԵՐԵՎԱՆ, 4 ՀՈՒՆԻՍԻ, ՆՈՅՅԱՆ ՏԱՊԱՆ: Երեւանի Կենտրոն եւ
Նորք-Մարաշ համայնքների առաջին ատյանի դատարանը` դատավոր Մնացական
Մարտիրոսյանի նախագահությամբ հունիսի 4-ին հրապարակեց 2006թ.
հունվարին Երեւանի երկու փոխանակման կետերի վրա ավազակային
հարձակման գործով դատավճիռը: Դատարանը հիմնավորված համարեց
նախաքննության կողմից ներկայացված մեղադրանքը եւ խմբի անդամներից
երկուսին` Վրաստանի քաղաքացի Անդրոնիկ Թորոսյանին եւ ՀՀ քաղաքացի
Սերգեյ Մովսիսյանին դատապարտեց ցմահ ազատազրկման: Ըստ գործի
նյութերի, Ա.Թորոսյանն է նախաձեռնել Երեւանի փոխանակման կետերի վրա
ավազակային հարձակումներ կատարելու «գործը», կազմավորել խումբ, որի
5 անդամներից 3-ը Վրաստանի քաղաքացիներ են: Ավազակային հարձակման
հետեւանքով սպանվել էր փոխանակման կետում գտնվող Արթուր Մկրտչյանը.
ըստ գործի նյութերի, նա սպանվել էր Ս.Մովսիսյանի կողմից դանակի
հարվածներից:
Դատավճռով Վրաստանի մյուս երկու քաղաքացիներ Նուգզար
Խոսիտաշվիլին եւ Կարեն Դավթյանը դատապարտվեցին համապատասխանաբար 14
եւ 13 տարվա ազատազրկման, իսկ ՀՀ քաղաքացի Հայկ Սարգսյանը` 8 տարվա
ազատազրկման: Դատարանը ամբողջությամբ բավարարեց տուժողի
իրավահաջորդ Ժորա Մկրտչյանի քաղհայցը շուրջ 4 մլն. դրամի չափով: