ԱՄԵՆ ՏԱՐԻ ԱՇԽԱՐՀՈՒՄ ԾԽԵԼՈՒ ՀԵՏԵՎԱՆՔՈՎ ՄՈՏ 5 ՄԼՆ ՄԱՐԴ Է
ՄԱՀԱՆՈՒՄ
31-05-2007 19:30:00 | Հայաստան | Հասարակություն
ԵՐԵՎԱՆ, 31 ՄԱՅԻՍԻ, ՆՈՅՅԱՆ ՏԱՊԱՆ: ՀՀ Առողջապահության
նախարարությունը «Ծխից ազատ միջավայր. ստեղծիր եւ վայելիր»
կարգախոսով միացավ մայիսի 31-ին նշվող «Առանց ծխախոտի»
համաշխարհային օրվան: Ինչպես նույն օրը կայացած ասուլիսում նշեց
ՄԱԿ-ի մշտական համակարգող Կոնսուելո Վիդալը, չծխողների համար
ծխախոտի երկրորդական ծխի վնասակարությունը գրեթե հավասարարժեք է
ծխելուն: Ըստ նրա, այն երեխաների ու չափահասների մոտ առաջացնում է
քաղցկեղ, ինչպես նաեւ լուրջ շնչառական եւ սրտամկանային
հիվանդություններ: Հետազոտություններից պարզվել է, որ այսօր
կանոնավոր ծխողների կեսը` շուրջ 650 մլն մարդ, ծխախոտի զոհ է
դառնալու: Կ.Վիդալի խոսքերով, անհանգստացնող է այն հանգամանքը, որ
հարյուր հազարավոր չծխող մարդիկ յուրաքանչյուր տարի մահանում են
այնպիսի հիվանդություններից, որոնք առաջանում են ծխախոտի
երկրորդական ծխից:
Կ.Վիդալը նշեց, որ ծխախոտը մահացության երկրորդ հիմնական
պատճառն է աշխարհում: Ամեն տարի ծխախոտի պատճառով ավելի շատ մարդ է
մահանում, քան ընդհանուր առմամբ պատահարներից,
ինքնասպանություններից, սպանություններից, ՁԻԱՀ-ից եւ
թմրանյութերից:
Առողջապահության համաշխարհային կազմակերպության ներկայացրած
տեղեկագրերում նշվում է, որ ամեն տարի ծխելու հետեւանքով մոտ 5 մլն
մարդ է մահանում եւ այսպես շարունակվելու դեպքում, 2020թ.-ին
տարեկան մոտ 10 մլն մահ կգրանցվի: