10 ՏԱՐՎԱ ԸՆԹԱՑՔՈՒՄ ՄԱԱ-ՈՒՄ ԿԱԶՄԱԿԵՐՊԵԼ ԵՆ 350-ԻՑ ԱՎԵԼԻ
ՀԱՆԴԻՊՈՒՄՆԵՐ ՔԱՂԱՔԱԿԱՆ, ՀԱՍԱՐԱԿԱԿԱՆ ԳՈՐԾԻՉՆԵՐԻ ՀԵՏ
22-05-2007 16:35:00 | Հայաստան | Հասարակություն
ԵՐԵՎԱՆ, 22 ՄԱՅԻՍԻ, ՆՈՅՅԱՆ ՏԱՊԱՆ: «1997թ.-ին հիմնադրված
Մամուլի Ազգային ակումբը (ՄԱԱ) ստեղծվեց «վիճահարույց նախագահական
ընտրություններից մեկ տարի անց, երբ հասարակական, քաղաքական կյանքը
թմրած էր եւ արթնության նշաններ ցույց չէր տալիս»: Ամփոփելով ՄԱԱ-ի
10-ամյա գործունեությունը, մայիսի 22-ի ասուլիսում ակումբի նախագահ
Նարինե Մկրտչյանը նշեց, որ ակումբի հիմնադրումով իրենք փորձեցին
ցույց տալ, որ հավատում են երկրի ժողովրդավարության եւ ազգային
արժեքների կենսունակությանը: Ն.Մկրտչյանի խոսքերով, 10 տարվա
ընթացքում ՄԱԱ-ում ընդհանուր առմամբ կազմակերպվել են 350-ից ավելի
հանդիպումներ քաղաքական, հասարակական եւ մշակութային գործիչների
հետ:
Անդրադառանալով ՄԱԱ-ի 10-ամյա գործունեությանը, «Նոյյան
տապան»-ի տնօրեն, ՄԱԱ-ի վարչության անդամ Տիգրան Հարությունյանը
նշեց, որ մի շարք օբյեկտիվ պատճառներով նախատեսված որոշ ծրագրեր
ՄԱԱ-ն չի հաջողել իրականացնել: Այդուամենայնիվ, ըստ նրա, նույնիսկ
եթե ՄԱԱ-ն ոչինչ չաներ, ապա միայն պաշտոնյաների հետ կազմակերպած
հանդիպումներն արդեն իսկ մեկ քայլ առաջխաղացում էին, քանի որ այդ
ժամանակաշրջանում քաղաքական որեւէ գործչից տեղեկատվություն ստանալը
բավականին մեծ խնդիր էր: «Մենք ճեղքեցինք այդ լռությունը եւ
ձեւավորեցինք այնպիսի մի իրավիճակ, որ պաշտոնյան կարող էր գալ եւ
պատասխանել լրագրողների հարցերին»,- նշեց Տ.Հարությունյանը: