ՍՅՈՒՆԻՔ ԵՎ ԳԵՂԱՆՈՒՇ ԳՅՈՒՂԱԿԱՆ ՀԱՄԱՅՆՔՆԵՐՈՒՄ ԱՆԱՍՈՒՆՆԵՐԻ
ԶԱՆԳՎԱԾԱՅԻՆ ԱՆԿՈՒՄ Է ԱՐՁԱՆԱԳՐՎԵԼ
18-05-2007 18:00:00 | Հայաստան | Հասարակություն
ԿԱՊԱՆ, 18 ՄԱՅԻՍԻ, ՆՈՅՅԱՆ ՏԱՊԱՆ: Մի քանի օր է, ինչ Կապանի
տարածաշրջանի Սյունիք ու Գեղանուշ գյուղերում անասունների,
հատկապես խոզերի անկում է արձանագրվում: Սյունիք գյուղի բնակիչ
Արշավիր Արշակյանի տնտեսությունում միայն վերջին 1 ամսվա ընթացքում
120 խոզերից 85-ը սատկել են: «Երբ նկատեցինք, անասնաբույժի
դիմեցինք, ասացին` բրուցելյոզ է: Դեղ տվեցին, բայց մենք կասկածում
էինք, որ դաբաղ է, քանի որ անասունների կճղակներն էին դուրս եկել,
նաեւ բերանների շրջակայքում փրփուր կար»,- ասաց Ա.Արշակյանը:
Սյունիքի գյուղապետ Սամվել Սարգսյանը «ՆՈՅՅԱՆ ՏԱՊԱՆ»-ի
թղթակցի հետ զրույցում նշեց, որ թեեւ պետպատվերի շրջանակներում
անասունները պատվաստվում են, սակայն այդ ծրագրով խոզերի
պատվաստումը նախատեսված չէ:
Ըստ Սյունիքի մարզի գլխավոր անասնաբույժ Էդգար Թոխսանցի,
դեռեւս միանշանակ չի կարելի ասել, որ անասունները դաբաղով են
հիվանդ: «Վետերինար հետազոտումները այժմ իրականացվում են
հանրապետական լաբորատորիայում: Միայն մի քանի օրից պարզ կլինի
իրավիճակը»,- ասաց Է. Թոխսանցը` ավելացնելով, որ մեծ խմբաքանակով
հատուկ պատվաստանյութ է ստացվել եւ մայիսի 18-ից սկսած կասկածելի
օջախ հանդիսացող համայնքների բոլոր անասուններին ներարկվելու է
պատվաստանյութը:
Նշենք, որ ուժեղացվել է հսկողությունը մսի վաճառքի կետերի
նկատմամբ: