ՈՍՏԻԿԱՆՈՒԹՅՈՒՆԸ ՇԱՐՈՒՆԱԿՈՒՄ Է ՀԵՐՔԵԼ ԸՆՏՐԱԿԵՂԾԻՔՆԵՐ
ԿԱԶՄԱԿԵՐՊԵԼՈՒ ՀԱՄԱՐ 400 ՀԱԶԱՐ ԱՆՁՆԱԳՐԵՐ ՏՊԱԳՐԵԼՈՒ ՄԱՍԻՆ
«ԻՄՊԻՉՄԵՆՏ» ԴԱՇԻՆՔԻ ՆԵՐԿԱՅԱՑՈՒՑՉԻ ՀԱՅՏԱՐԱՐՈՒԹՅՈՒՆԸ
ՈՍՏԻԿԱՆՈՒԹՅՈՒՆԸ ՇԱՐՈՒՆԱԿՈՒՄ Է ՀԵՐՔԵԼ ԸՆՏՐԱԿԵՂԾԻՔՆԵՐ
ԿԱԶՄԱԿԵՐՊԵԼՈՒ ՀԱՄԱՐ 400 ՀԱԶԱՐ ԱՆՁՆԱԳՐԵՐ ՏՊԱԳՐԵԼՈՒ ՄԱՍԻՆ
«ԻՄՊԻՉՄԵՆՏ» ԴԱՇԻՆՔԻ ՆԵՐԿԱՅԱՑՈՒՑՉԻ ՀԱՅՏԱՐԱՐՈՒԹՅՈՒՆԸ
16-05-2007 18:43:00 | Հայաստան | Հասարակություն
ԵՐԵՎԱՆ, 16 ՄԱՅԻՍԻ, ՆՈՅՅԱՆ ՏԱՊԱՆ: Մայիսի 12-ին Ազգային
Ժողովի ընտրությոններին մասնակցած քաղաքացիներից իրենց ընտրական
իրավունքը վերականգնել են 1906-ը, այդ թվում` 80-ը դատական կարգով,
1826-ը` տարածքային անձնագրային ծառայությունների կողմից տրված
տեղեկանքների հիման վրա: Այս մասին լրագրողների հետ մայիսի 16-ի
հանդիպմանը հայտնեց ՀՀ ոստիկանության լրատվության եւ
հասարակայնության հետ կապի վարչության պետ Սայաթ Շիրինյանը: Ըստ
նրա, անձնագրային ծառայություններում տեղեկանքներ ստացածների 80
տոկոսը եղել են նոր սեփականատերերի դիմումներով հաշվառումից հանված
քաղաքացիներ:
Ս.Շիրինյանը հերքեց «Իմպիչմենտ» դաշինքի ներկայացուցիչ Նիկոլ
Փաշինյանի հայտարարությունն այն մասին, թե տպագրվել են 400 հազար
անձնագրեր, որոնցով իշխանությունները ընտրակեղծիքներ են
կազմակերպել: Նա հայտնեց, որ 2006թ. մայիսի 10-ից մինչեւ 2007թ.
մայիսի 10-ը տպագրվել է 194 հազար 623 անձնագիր, որից 31 795-ը 1
օրականից մինչեւ 16 տարեկան անձանց, 49 717-ը` 16-18 տարեկանների,
113 118-ը` 18-ից բարձր տարիքի քաղաքացիների համար:
Ս.Շիրինյանը տեղեկացրեց, որ ոստիկանությունը անձնագրերի
տպագրության հարցով պայմանագրային հիմունքներով աշխատում է միայն
ֆրանսիական մի կազմակերպության հետ: 2004-2006թթ.-ին այդ
կազմակերպության կողմից մատակարարվել են 453 հազար 977 հատ
անձնագրերի գրքույկներ:
Ս.Շիրինյանը հայտնեց, որ ընտրությունների օրը
ընտրախախտումների վերաբերյալ ստացվել է 433 ահազանգ: Ոստիկանության
կողմից ստուգման են ենթարկվել իր իրավասության ներքո գտնվող 201
ահազանգ, որոնցից 9-ի կապակցությամբ նախապատրաստվել են նյութեր,
3-ի կապակցությամբ քրեական գործի հարուցումը մերժվել է,
ընտրակաշառքի 1 փաստով քրեական գործ է հարուցվել: